Teenkanting oor formule vir landbougrondwaardasie

geld ekonomie suid-afrika

Argieffoto

Die sakeregtewaghond AfriSake is gekant teen die voorgestelde eiendomswaardasieformule in die Eiendomwaardasiewetsontwerp wat spesifiek van toepassing sal wees op grond wat vir grondhervorming geoormerk is en/of vir onteiening deur ’n staatsdepartement geïdentifiseer word.

AfriSake is tans besig om kommentaar op te stel wat hy by die departement van landelike ontwikkeling en grondhervorming gaan indien.

Dr. Anthea Jeffery, hoof van beleidsnavorsing by die Suid-Afrikaanse Instituut vir Rasseverhoudinge, het die werking van die voorgestelde formule soos volg uiteengesit: Indien ’n plaas ’n markwaarde van R1 miljoen en ’n netto inkomste van R100 000 per jaar lewer, bepaal die formule dat die som van dié twee bedrae deur twee gedeel word, wat sal neerkom op ’n waardasie van R550 000 – die helfte van die werklike waarde van die grond.

“Gugile Nkwinti, minister van landelike ontwikkeling en grondhervorming, en sy destruktiewe regulasies en beleide sal grootliks aanspreeklik wees vir die ondergang van voedselsekerheid en ’n florerende landbou-ekonomie,” het Charles Castle, bestuurder by AfriSake, gesê. “Hierdie wetsontwerp is net nóg ’n spyker in die doodskis van ekonomiese groei in en ontwikkeling van die landbousektor.”

Lindiwe Sisulu, minister van menslike nedersettings, het intussen ook die Wetsontwerp op Eiendomspraktisyns ingedien. Dié wetsontwerp beoog om eiendomsagente te reguleer om onder meer die eiendomsmark te transformeer.

Ander onlangse wetsontwerpe, beleide en voorstelle wat eiendomsreg direk bedreig, sluit in die Wetsontwerp op die Regulering van Landbougrondbesit, die voorgestelde Grondhervormingwysigingswet, die voorstel van ’n welvaartbelasting op grond en ’n nasionale belasting op die waarde van eiendom bo en behalwe gewone munisipale erfbelasting.

AfriSake sal met die ondersteuning van sy lede onverpoosd vir ekonomiese welvaart en vryheid vir alle Suid-Afrikaners voortveg.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
Johann Marx

En wanneer gaan hierdie land se mense “equal” wees volgens die ANC? Die dag as almal ewe NIKS oor het nie!!

JJ

Dis niks anders as diefstal.

Alta

Voor suma gaan wil hy en sy travante nou genoeg steel

Cherokee

Dit kom neer op 50% onteiening sonder vergoeding.

Paul

Die artikel laat een van die belangrikste verdere dele van die voorstel uit. Daar word ook voorgestel dat enige grond wat ge-erf is of as ‘n geskenk verkry is, se waarde toe dit ge-erf is in ag geneem moet word, aangepas vir inflasie, en dat dit van die vergoeding afgetrek moet word voor die bedrag in twee gedeel word. So as mens die voorbeeld hierbo neem en ‘n boer het sy plaas dekades gelede ge-erf toe die grond byvoorbeeld R300 000 werd was, dan sal die waarde destyds in ag geneem word, aangepas vir inflasie intussen. Hulle noem dit die… Lees meer »