Franse bakkers van Suresnes in Parys, Frankryk, het Sondag ʼn nuwe Guinness-wêreldrekord opgestel toe hulle ʼn baguette van 140,53 m lank gebak het.
Dié ellelange Franse baguette het stof geskop in die oë van ʼn megabrood van 132,62 m wat in 2019 in Como, Italië, gebak is.
ʼn Span van 18 bakkers het die reusebrood tydens ʼn geleentheid vir die French Confederation of Bakers and Pastry Chefs gebak.
“ʼn Rekord vir die langste handgemaakte baguette vereis ware gees en kollektiewe sportmanskap,” sê Dominique Anract, president van die organisasie.
“Brood is die enjin vir prestasie, en ons baguette is ʼn belangrike deel van ons [Frankryk se] gastronomiese erfenis.”
Deelnemende bakkers het om 03:00 aan 152 kg se deeg begin knie. Die deeg het sowat 90 kg meel, 60 liter water, 1,2 kg sout en 1,2 kg gis bevat.
Die baguette is gebak in ʼn stadig bewegende oond op wiele.
“Suresnes is trots om die plek te wees vir hierdie rekord vir die langste baguette ter wêreld, aangesien dit ons nasionale, gastronomiese simbool bevorder asook die ambagslui wat hulle kennis laat voortbestaan,” sê burgemeester Guillaume Boudy.
“Ek wens die bakkers van Suresnes wat aan die geleentheid deelgeneem het, geluk.”
Anthony Arrigault, een van die bakkers, sê hy is trots dat hy aan die geleentheid deelgeneem het. “En dit boonop in my tuisdorp,” het hy gesê.
Die baguette is opgesny en aan die publiek uitgedeel.
ʼn Tradisionele Franse baguette is sowat 60 cm lank en word gemaak met slegs meel, sout en gis, en weeg omtrent 250 g, volgens die amptelike maatreëls.