Soorte resepte:

ʼn Piekniekmandjie se moet-hê-item: Springmielies

ʼn Piekniek is altyd ʼn goeie idee, of dit ʼn romantiese ete op die sitkamervloer, ʼn Sondagmiddag in die parkie saam met die kinders, óf ʼn aand van flieks by Maroela Media se buitebioskoop is, dit is iets wat almal geniet – oud en jonk!

Dit is wel noodsaaklik om ʼn lekker piekniekmandjie te pak wat ietsie vir almal inhou. Een item waarsonder ʼn piekniekmandjie nie kan klaarkom nie, is springmielies. Springmielies is maklik, moeiteloos, én jy kan dit op baie verskillende maniere voorberei.

Volg hierdie resep om jou springmielies elke keer perfek te maak, en vertel ons wat jou gunstelingmanier is om springmielies te eet. Een gelukkige piekniek-liefhebber kan twee kaartjies na Maroela Media se buitebioskoop op 16 September wen.

Vir meer inligting oor Maroela Media se buitebioskoop kliek hier.

[Resep] Perfekte springmielies elke keer

Bestanddele:

  • ¼ k olie
  • ⅔ k springmielies
  • sout/versiersuiker

Metode:

  1. Gooi olie in ʼn kastrol en plaas op ʼn stoofplaat by medium tot hoë hitte.
  2. Gooi dadelik drie mieliepitte in die kastrol.
  3. Hou die kastrol toe tot jy hoor al drie mieliepitte het gespring.
  4. Haal nou die drie springmielies uit en gooi die res van die pitte in (dit moet die bodem van die kastrol bedek).
  5. Maak die kastrol se deksel toe en verwyder vir 30 sekondes van die hitte.
  6. Sit die kastrol terug op die hitte en laat al die mielies spring.
  7. Luister vir wanneer die springgeluide minder raak. Wanneer jy tot 10 kan tel tussen springgeluide, weet jy jy kan die kastrol afhaal.
  8. Haal die deksel af en gooi sout of versiersuiker oor, gooi dit dan in ’n roomysbak en bedien almal op jou piekniekkombers!

Net soos ʼn pannekoek met die beste resep nog steeds kan flop, kan Maroela nie pa (of ma!) staan vir enige van die resepte wat jy self by die huis probeer nie. Elke koppie meel, bakpoeier, melk, eier of enige ander bestanddeel is dus in jou eie hande en Maroela Media kan nie enige verantwoordelikheid aanvaar vir komplimente (of klagtes) oor jou kookvernuf nie. -Red

Deel van: Doen-dinge, Flieks, Koolstoof

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae