Novak Djokovic. Foto: Kena Betancur/AFP.
Justine Henin het vroeër gesê dat Novak Djokovic nooit so gewild soos Roger Federer of Rafael Nadal onder tennisondersteuners sal wees nie.
Nou meen Nikola Pilic, ’n voormalige Kroatiese tennisspeler, dat die 34-jarige Serwiër inderdaad stief deur die tennisgemeenskap behandel word.
En Pilic het veral na verlede jaar se Amerikaanse Ope-toernooi verwys.
Djokovic se opmars na ’n vierde titel in New York het skielik in ’n wedstryd teen Pablo Carreño Busta tot ’n einde gekom.
Die wêreld se voorste speler het destyds ’n gulde geleentheid deur sy vingers laat glip om die eerste stel teen die Spanjaard te wen. Uit pure frustrasie het hy die bal weggeslaan en een van die wedstrydbeamptes teen haar keel getref.
Hy het haar onmiddellik te hulp gesnel, maar ná ’n lang gesprek met beamptes is daar besluit om sy Ope-veldtog te beëindig en hy is gediskwalifiseer.
Ten spyte van die feit dat die Amerikaanse tennisowerhede bevestig het dat die voorval bloot net ’n ongeluk was, is Djokovic steeds beboet.
“As Roger Federer dieselfde ding as Novak Djokovic gedoen het, sou hulle hom beslis nie gediskwalifiseer het nie,” het Pilic aan ’n plaaslike koerant gesê.
Die wêreld se no. 1-speler geniet ’n wipplank-verhouding met tennisondersteuners. Soms hou hulle van hom en ander kere nie, terwyl hy ook gereeld uitgejou word.
Maar ná vanjaar se Amerikaanse Ope-eindstryd teen Daniil Medvedev het hy ’n paar toeskouers bygekry.
“Natuurlik is ek hartseer, daar was so baie op die spel. Maar selfs al het ek nie gewen nie, is ek steeds die gelukkigste man ter wêreld, want julle het my baie spesiaal laat voel. Ek het nog nooit so in New York gevoel nie,” het ’n emosionele Djokovic ná die wedstryd gesê.
Terselfdertyd was hy ook verlig dat alles verby is – daar was baie druk op hom om Rod Laver se rekord van vier Grand Slams in een jaar te ewenaar.
“As professionele sportman wil jy graag wedstryde wen, maar hierdie oomblik is een wat ek vir altyd sal koester.”
Volgens Pilic het hy destyds aan Serwiese joernaliste gesê dat hy slegs vir Djokovic as die beste speler nóg sal bestempel as hy vanjaar se Wimbledon-toernooi sou wen.
Iets wat die Serwiër terstond gedoen het.
Novak Djokovic has been defaulted from 2020 US Open.
Lesson:
-Staying calm is highly important even if you are already at the top-Never led your disappointment turn into Anger
-Just a second of reaction has power to change your life for good or bad
Courtesy: SM pic.twitter.com/IQ9WWYasRZ
— Awanish Sharan (@AwanishSharan) September 7, 2020
"I love you guys."
All the feels from @DjokerNole to the fans in New York. pic.twitter.com/PnEHevMVKk
— US Open Tennis (@usopen) September 12, 2021
