Novak Djokovic en Roger Federer. Foto: David Gray/AFP.
Novak Djokovic het Maandag amptelik die leisels by Roger Federer oorgeneem as die speler wat die septer op die ATP-wêreldranglys al die langste swaai.
Die 33-jarige Serwiër is nou vir ’n ongelooflike 311 weke van sy loopbaan die wêreld se voorste speler. Maar hy het steeds net lof vir die 39-jarige Federer.
“Wat Roger op sy ouderdom vermag is ’n inspirasie vir almal en dit is baie lekker om hom weer terug op die baan te hê,” het Djokovic gesê.
Die wêreldwye Covid-19-pandemie het saam met ’n paar knie-operasies gesorg dat Federer vir langer as ’n jaar die aksie van langs die baan dopgehou het, maar hy maak vandeesweek sy terugkeer in die Katar Ope in Doha.
“Toe ek 15 jaar gelede professionele tennis begin speel het, het ’n reuse-uitdaging my in die gesig gestaar: Om beter as Roger en Rafa (Nadal) te speel.”
Die pad na sukses was aanvanklik nie te maklik nie en Djokovic kon in die eerste drie jaar van sy loopbaan nie ’n enkele wedstryd teen die twee wen nie.
“Hulle het my ongetwyfeld die speler gemaak wat ek vandag is. Ek moes noodgedwonge my huiswerk doen en na maniere soek om op die baan teen hulle verbeter. Die wedywering tussen ons drie het die grootste invloed op my spel gehad.”
