Die geruite vlag is vir Lando Norris in Miami geswaai. (Foto: X/F1)
Meer as drie miljoen Amerikaners (3,1 miljoen om presies te wees) het Sondag die F1-aksie in Miami op hul TV’s gevolg.
Lando Norris het met die louere weggejaag, met Max Verstappen en Charles Leclerc wat die podium-prentjie voltooi het.
Dit is die meeste kykers nóg uit die VSA. Die vorige rekord van 2,6 miljoen kykers is in 2022 opgestel toe die geruite vlag vir Verstappen in Miami geswaai is.
Daarbenewens het 946 000 kykers die blitsren op ESPN gevolg; óók ’n rekord.
Die vonkelwynproppe het omtrent in die McLaren-hoekie geklap toe Norris sy eerste wedren in 110 probeerslae gewen het.
“Dankie tog, dit is hoogtyd!” het die jong Engelsman ná afloop van die wedren gesê.
“Dit het my ʼn hele ruk geneem, maar ek kon dit uiteindelik regkry. Ek kon uiteindelik vir my span wys waartoe ek in staat is. Dit was ʼn lang en taai wedren, maar ek het gewen en ek is ongelooflik bly!”
Volgens Norris het hy vroeg reeds geweet dat hy vinnig genoeg is om sy stempel op Miami af te druk.
“Ons het nogtans ʼn paar foute gemaak, maar vandag het alles in plek geval. Daarbenewens het ons strategie ook mooi uitgewerk.”
Verstappen is egter steeds die algehele voorloper op die jaerspunteleer en die wedrenaksie word op 17 Mei op die Emilia Romagna-baan in Italië hervat.
The 2024 Miami Grand Prix attracted F1’s largest live audience in United States television history ????????????#F1 #MiamiGP | Full story ⤵️
— Formula 1 (@F1) May 7, 2024
Jaerspunteleer:
- Max Verstappen: 136 punte
- Sergio Perez: 103 punte
- Charles Leclerc: 98 punte
- Lando Norris: 83 punte
- Carlos Sainz: 83 punte
- Oscar Piastri: 41 punte
- George Russell: 37 punte
- Fernando Alonso: 33 punte
- Lewis Hamilton: 27 punte
- Yuki Tsunoda: 14 punte
Vervaardigerspunteleer:
- Red Bull: 239 punte
- Ferrari: 187 punte
- McLaren: 124 punte
- Mercedes: 64 punte
- Aston Martin: 42 punte.
