Christiaan Bezuidenhout. (Foto: Yoshi Iwamoto/AFP)
Die meeste van die aandag was ná Saterdagaand (Suid-Afrikaanse tyd) se derde ronde van die American Express-toernooi wat by La Quinta in die Kaliforniese woestyn beslis word, op die Spaanse gholfspeler Jon Rahm en die Amerikaanse groentjie Davis Thompson gerig. Die opmars van Suid-Afrika se Christiaan Bezuidenhout is vreemd genoeg ʼn bietjie opsy geskuif.
Rahm is ná sy 65 houe (-7) in die derde ronde saam met Thompson voor (albei 193, -19).
Bezuidenhout, wat 62 houe (-10) aangeteken het, is saam met die Amerikaner JT Poston derde op 197 (-15) met Tom Kim, Harry Higgs, Sam Burns en Taylor Montgomery saam vyfde op 198 (-14).
Bezuidenhout, wat tien voëltjies aangeteken het en nie ʼn hou aan baansyfer afgestaan het nie, het met 18 plekke opgeskuif.
Van die ander Suid-Afrikaners is Dean Burmester, Garrick Higgo en Erik van Rooyen almal goed geplaas op 203 (-11) om hopelik te help skep aan die enorme prysgeld van R136 miljoen.
* In Abu Dhabi loop drie spelers, naamlik Franceso Molinari (Italië), Min-Woo Lee (Australië) en Sean Lowry (Ierland), saam voor ná die derde ronde van die HSBC-toernooi op 203 (-13).
Hulle word gevolg deur Grant Forrest (Skotland), Sebastian Soderberg (Swede) en Victor Perez (Frankryk) wat almal op 204 houe (-12) geëindig het.
Suid-Afrika se George Coetzee is op 207 (-9) en Ockie Strydom op 215 (-4).
* In die Amerikaanse LPGA-toernooi vir vroue wat by Lake Nona in Orlando, Florida, beslis word, het Suid-Afrika se Paula Reto en Ashleigh Buhai hul waarde in die derde ronde onderstreep.
Die Kanadees Brooke Henderson (202, -14) het aan haar voorsprong geklou en sy is drie houe voor Nasa Hataokja (Japan) en Nelly Korda (Amerika) wat albei op 205 (-11) geëindig het.
Hulle word gevolg deur Maja Stark (Swede) en Charley Hull (Brittanje) op 207, met Reto op 210 (-6) saam sesde.
Reto het 67 houe in die derde ronde aangeteken, net soos Buhai (211, -5) wat ʼn hele paar plekke opgeskuif het en 11de is.
