Die Stormers speel op 27 Mei teen Munster in die VRK-eindstryd. (Foto: Hansie Linde)
Die Stormers speel op 27 Mei in sy tweede agtereenvolgende Verenigde Rugbykampioenskap-eindstryd wanneer daar teen Munster op die DHL-stadion kragte gemeet word.
Kaartjies vir die rugbyskouspel sal vanaf Donderdag (18 Mei) beskikbaar wees en luidens ʼn amptelike verklaring sal pryse tussen R80 en R375 wissel.
“As ʼn blyk van waardering vir die lojaliteit van seisoenkaartjiehouers, sal seisoenkaartjies ook vir volgende naweek se wedstryd geldig wees.”
Verder sal kaartjies wat via Ticketpro aangekoop word, geldig wees.
Die Stormers het vir die eindstryd gekwalifiseer toe hulle ʼn aksiebelaaide stryd teen Connacht met 43 – 25 gewen het.
Daarteenoor het die suksesvolle skepskoppoging van Munster se Jack Crowley nie net Leinster se bekerplanne gepootjie nie, maar terstond ook ʼn tuiseindstryd vir die Stormers verseker.
Die eindstryd bied ook die perfekte geleentheid om Steven Kitshoff behoorlik te groet voordat hy na Ulster vertrek.
Die Stormers-kaptein en Springbok-stut het juis verlede week ʼn barshou teen Connacht gespeel en nóg ʼn trofee sal ʼn baie lekker afskeidsgeskenk wees.
Terselfdertyd het verskeie spelers in aanloop tot die eindstryd gesê dat hulle hul ondersteuners ʼn rede wil gee om te glimlag.
- Die eindstryd vind op 27 Mei plaas en die aksie sal om 18:30 begin.
Tickets for the @Vodacom #URC Grand Final between the DHL Stormers and Munster at DHL Stadium will go on sale exclusively from Ticketpro on Thursday from just R80 each. Season tickets will be valid. #iamastormer #dhldelivers #UnitedWeRise @URCOfficial https://t.co/oOUHiUpzNC
— DHL Stormers (@THESTORMERS) May 15, 2023
