Wat uitslae betref, geniet die Blitsbokke ʼn goeie aanloop tot die Perth-sewestoernooi. Hulle is onoorwonne ná die eerste dag se spel nadat hulle ʼn kort rukkie gelede vir Spanje met 21–14 geklop het.
Die wedstryd het egter glad nie op ʼn goeie noot vir die Suid-Afrikaners begin nie toe Zain Davids met ʼn geel kaart van die veld afgestuur is omdat hy die bal afgeklap het.
Jaime Manteca het die Blitsbokke onmiddellik vir dié dissiplineblaps laat boet toe hy in die hoek vir ʼn drie oorgeduik het.
Tog kon Ronald Brown en Quewin Nortjé – al twee kere teen die verloop van spel – met driedrukpogings van hul eie terugslaan en teen rustyd het die Blitse ʼn voorsprong van 14–7 geniet.
In die tweede helfte het kaptein Selvyn Davids weer met ʼn gebruiklike zoep-zap-en-zirts-lopie beïndruk, maar die Suid-Afrikaners sal beslis beter moet speel as hulle enige drome het om die silwerware omhoog te hou.
Selvyn Davids dazzles in @Blitzboks' win against Spain ????#HSBCSVNS | #HSBCSVNSPER pic.twitter.com/XEApySMVz4
— HSBC SVNS (@SVNSSeries) January 26, 2024
Die ware toets wag immers môre wanneer hulle om 06:38 teen Argentinië speel.
Die vlieënde Argentyne beskik oor die ongekende vermoë om ʼn spul drieë binne ʼn japtrap te druk en hulle kan teenstanders se voete onder hulle uithardloop.
- Puntemakers:
Blitsbokke: Drieë: Ronald Brown, Quewin Nortjé en Selvyn Davids.
- Uitslae:
24–7 teen Kanada
21–14 teen Spanje