Sandile Ngcobo in aksie (Photo by Renee McKay/Getty Images)
Die Wêreldsewesreeks skop aanstaande maand in Hongkong af en Suid-Afrika en sy nuwe breier se eerste teenstanders is Uruguay.
Die Blitsbok-afrigter Sandile Ngcobo en sy span meet op 4 November met Uruguay kragte op die eerste dag van dié driedaagse toernooi, waarna hulle op Saterdag 5 November teen Engeland en Frankryk speel.
Die uitspeelrondes van die nuwe seisoen se eerste sewestoernooi word op 6 November beslis.
Ngcobo vat hierdie seisoen die eerste keer die Blitsbok-leisels nadat Neil Powell dié span die afgelope dekade gebrei het.
Powell het verlede maand die tuig neergelê om hom by die Sharks as direkteur van rugby aan te sluit.
Australië is die sewesreeks se kampioenspan nadat hy verlede seisoen net-net met Suid-Afrika afgereken het.
Die Aussies het die reeks met 126 teenoor die Blitsbokke se 124 ingepalm danksy hul brons medalje in die seisoen se laaste toernooi in Los Angeles.
Die Aussies het ook die Wêreldbekertoernooi in Suid-Afrika gewen.
Die volledige sewesprogram vir die 2022‑’23-seisoen is:
4-6 November: Hongkong
2-3 Desember: Dubai
9-11 Desember: Kaapstad
21-22 Januarie: Hamilton
27-29 Januarie: Sydney
25-26 Februarie: Los Angeles
3-5 Maart: Vancouver
31 Maart-2 April: Hongkong
8-9April: Singapoer
12-14 Mei: Toulouse
20-21 Mei: Londen.
Groepe vir Hongkong:
A: Australië, Nieu-Seeland, Samoa, Hongkong
B: Suid-Afrika, Frankryk, Engeland, Uruguay
C: Fidji, VSA, Spanje, Japan
D: Argentinië, Ierland, Kenia, Kanada.
Suid-Afrika se Hongkong-bepalings:
4 November: Uruguay
5 November: Engeland, Frankryk.
