Die Stormers-rugbyspan het reeds vandag sy Kersgeskenk gekry toe hy die Bulls met 26 – 20 in ʼn Verenigde Rugbykampioenskap-wedstryd op die DHL-stadion geklop het.
Dit was die Stormers se sewende agtereenvolgende oorwinning teen die Pretorianers in dié kompetisie.
Die eerste helfte was ʼn aksiebelaaide affêre met ʼn Manie Libbok-strafskop en ʼn Damian Willemse-skepskop wat vir die aanvanklike Stormers-momentum gesorg het.
Daarna was dit egter punte Pretoria: Reinhardt Ludwig het die eerste drie van die wedstryd gedruk, waarna Kurt-Lee Arendse sy sokkervaardighede uitgestal het om die tuisspan se verdedigers te flous.
Embrose Papier ???? Kurt-Lee Arendse
Absolute flair shown by the Vodacom @BlueBullsRugby ????#BKTURC #URC | #STOvBUL pic.twitter.com/DUmCTKkE0e
— BKT United Rugby Championship (URC) (@URCOfficial) December 23, 2023
Skielik het die Bulls die hef in die hand gehad, maar Gerhard Steenekamp se geel kaart – sy skouer het Neethling Fouché in die gesig getref – het die besoekers se momentumtrein so ʼn bietjie ontspoor.
Die Stormers kon deur Jean-Luc du Plessis en Libbok terugslaan en teen rustyd het hulle weer ʼn voorsprong van 16 – 10 geniet.
Tussendeur alles is twee van hul driedrukpogings ook nie toegeken nie.
Deon Fourie se knieg-op-die-grond-beweging het vir hopeloos te veel veerkrag naby die doellyn gesorg, terwyl Suleiman Hartzenberg se voet op die lyn gerus het nadat hy ʼn skop uit die lug gepluk het.
Die Bulls spog met ʼn baie gevaarlike agterste driehoek in Willie le Roux, Canan Moodie en Arendse en hulle het vroeg in die tweede helfte hul stempel op die kragmeting afgedruk.
Le Roux se skerpskutter-aangee het vir Moodie gevind wat in die hoekie oorgeduik het.
Die besoekers se vreugdevure het egter skaars vlamgevat of Ruhan Nel het dit weer geblus toe hy die tuisspan se tweede drie gedruk het.
Ruhan Nel doing Ruhan Nel things ????#BKTURC #URC | #STOvBUL | DHL @TheStormers pic.twitter.com/VA3CMgjz9y
— BKT United Rugby Championship (URC) (@URCOfficial) December 23, 2023
Chris Smith was in die 72ste minuut in die kol met ʼn strafskop, maar die Bulls het te veel gehad om te doen en hul wenuurglas het leeggeloop.
- Puntemakers:
Stormers: Drieë: Jean-Luc du Plessis en Ruhan Nel. Doelskoppe: Manie Libbok (2). Strafskoppe: Libbok (3). Skepskop: Damian Willemse.
Bulls: Drieë: Reinhardt Ludwig, Kurt-Lee Arendse en Canan Moodie. Doelskop: Johan Goosen. Strafskop: Chris Smith.
- Spanne:
Stormers: Damian Willemse, Suleiman Hartzenberg, Ruhan Nel, Jean-Luc du Plessis, Leolin Zas, Manie Libbok, Paul de Wet, Hacjivah Dayimani, Ben-Jason Dixon, Deon Fourie (kaptein), Ruben Fourie, Adre Smith, Neethling Fouche, Joseph Dweba en Sti Sithole. Plaasvervangers: André-Hugo Venter, Ali Vermaak, Brok Harris, Connor Evans, Willie Engelbrecht, Keke Morabe, Stefan Ungerer en Clayton Blommetjies.
Bulls: Willie le Roux, Canan Moodie, Stedman Gans, David Kriel, Kurt-Lee Arendse, Johan Goosen, Embrose Papier, Cameron Hanekom, Elrigh Louw (kaptein), Marco van Staden, Reinhardt Ludwig, Janko Swanepoel, Wilco Louw, Akker van der Merwe en Gerhard Steenekamp. Plaasvervangers: Jan-Hendrik Wessels, Simphiwe Matanzima, Mornay Smith, Deon Slabbert, Mpilo Gumede, Keagan Johannes, Chris Smith en Sebastian de Klerk.
- VRK-uitslae tussen Stormers en Bulls:
22 Januarie 2022: Stormers 30 – 26 Bulls
9 April 2022: Stormers 19 – 17 Bulls
18 Junie 2022: Stormers 18 – 13 Bulls (eindstryd)
23 Desember 2022: Stormers 37 – 27 Bulls
18 Februarie 2023: Stormers 23 – 19 Bulls
6 Mei 2023: Stormers 33 – 21 Bulls
23 Desember 2023: Stormers 26 – 20 Bulls