Hyundai se Kona ʼn lekker kruismodel

Die Hyundai Kona. Foto: Verskaf

Wat presies is ʼn kruismodel? Vat ʼn klein na mediumgrootte luikrug, pomp hom op na so 2.5 bar, gee vir hom hoër vering en oulike stilering … en siedaar. Hyundai het twee kruismodelle tans in die mark: die Creta en die Kona. Die Creta het ʼn aangename maar konserwatiewe stilering. Dit het ʼn gaping in die mark gelaat vir ʼn interessante ontwerp – dis die Kona.

Met die oogopslag is die Kona ʼn mooi voertuig. Die stilering is nie vir almal nie, maar vir dié wat iets anders soek, is dit goed. Die binneruim is verbasend goed vir my. Die bougehalte, kwaliteit en luukshede is regtigwaar uit die boonste rakke.

Die Hyundai Kona. Foto: Verskaf

Die Kona het alles … leerbekleedsel, CarPlay en Android Auto, outomatiese ligte en ruitveërs, selfverduisterende truspieëltjie – de lot. Hy’s veilig ook met ʼn vyfster-NCAP-gradering. Wat dié gradering moontlik maak, is blindekolwaarskuwing en agterste kruisverkeerwaarskuwing. Ek bly in ʼn pypsteel en die kruisverkeerwaarskuwing werk puik.

Dié Kona op toets is die 2.0- atmosferiese viersilinderpetrolenjin. Dié enjin gaan gepaard met Hyundai se sesspoed-wringkragomsitter- outomatiese ratkas. Dié enjin bied 110 kW en 180 Nm; 0-100 km/h duik op in ʼn billike 10 sekondes en hy sal aanhou draf tot 194 km/h. Die Kona het ʼn 50 ℓ-brandstoftenk en behoort 7.2 ℓ/ 100 km te handhaaf.

Die Hyundai Kona. Foto: Verskaf

Dit sal ʼn reikafstand van net by die 700 km bied. As mens baie rustig op die oop pad ry, kan die 2.0-Kona so laag soos 6 ℓ/ 100 km bied. Indrukwekkend vir ʼn 2.0-outo.

Op die pad voel die Kona luuks. Die vering is soepel genoeg sonder om hantering te belemmer. Padhouvermoë is in die kol vir ʼn kruismodel. Dit sitplek kan net só stel en die stuurwiel kan vir reik en kantel stel – mens is altyd verseker dat jy heeltemal gemaklik is.

Die Hyundai Kona is ʼn indrukwekkende produk teen ʼn billike prys. Die spesifikasievlak beïndruk en die gehalte is puik. Ek het slegs een kwaal. Die kopligte is vir my dof, veral teenoor die nuwe LED-tipes waarmee van die voertuie nou mee toegerus is.

Die reeks lyk só:

Hyundai Kona 1.0 TGDI Executive handrat88 kW/172 Nm12 sek181 km/h6.8 ℓ/100 kmR384 900
Hyundai Kona 2.0 Executive outo110 kW/180 Nm10 sek194 km/h7.2 ℓ/100 kmR404 900

Die reeks word gedek deur Hyundai se 5 jaar/150 000 km-voertuigwaarborg en 7 jaar/200 000 km-dryfstelselwaarborg asook ʼn 5 jaar/90 000 km-diensplan. Diensintervalle is elke 15 000 km.

Die kompetisie lyk só:

Toyota C-HR 1.2T Plus outo85 kW/185 Nm6.4 ℓ/100 km11.1 sek185 km/hR357 800
Mitsubishi Eclipse Cross 2.0 CVT110 kW/198 Nm7.9 ℓ/100 km12.1 sek188 km/hR399 995
Subaru XV 2.0i115 kW/196 Nm5.9 ℓ/100 km10.4 sek194 km/hR400 900
Nissan Qashqai 1.2T Acenta Plus outo85 kW/165 Nm6.2 ℓ/100 km12.9 sek173 km/hR418 900
Honda HR-V105 kW/172 Nm6.8 ℓ/100 km10.1 sek188 km/hR428 300

Tussen dié mededingers kies ek die Subaru XV – dit is die enigste produk wat teen dié prys vierwielaandrywing bied en dus ʼn ander dimensie aan die voertuig bied.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

KrokodilBotha ·

Die brandstof verbruik wat maatskappe altyd voorsien , hmmmm ja nee hehehe. Seker teen afdraande , sonder bagasie , klip harde bande, en wind van agter. Drome.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.