Met Maroela Media en kykNET se sepiegids kan jy nou weekliks ʼn voorsmakie kry van die gebeure in jou gunstelingsepie.
Jacques Bessenger as Nolan in ‘Arendsvlei’. (Skermgreep)
Binnelanders
Weekdae om 19:30 op kykNET
Maandag 3 Januarie
Sosiale media laat die kollig op een persoon val. Ilse is nie die enigste een met ʼn geheim nie, terwyl Gaby ʼn belangrike vraag het vir Danny.
Dinsdag 4 Januarie
Musiek is die perfekte pleister vir hartseer, terwyl Annelize vir Naomi onkant vang met ʼn liefdadigheidsprojek. Steve kan nie vir Lexi ʼn rat voor die oë draai nie.
Woensdag 5 Januarie
Danny dink daar is ʼn slang in die gras, terwyl Steve se verlede hom vinniger inhaal as waarop hy voorbereid is. Rian en Tertius probeer hul bes om saam te werk.
Donderdag 6 Januarie
Gaby probeer ʼn plan beraam om haar vrese te besweer, terwyl Steve vir Danny kwalik neem vir sy eie aksies. Annelize moet ʼn erg emosionele verpleegster huis toe stuur.
Vrydag 7 Januarie
Rodney se woorde tref Gaby hard – en dit gaan nie ongesiens verby nie. Annelize wonder hoe Steve se familiedrama hom beïnvloed.
Suidooster
Weekdae om 18:30 op kykNET en kykNET&kie
Maandag 3 Januarie
Elana kry raad wat haar omkrap, terwyl Susan met harde waarhede gekonfronteer word. Greg word tot die uiterste getoets, en Wade begin met nuwe oë na die wêreld kyk.
Dinsdag 4 Januarie
Bianca kry hulp uit ’n onverwagte oord. Bridgette is besorg dat Donovan se broer te swaar op hom leun terwyl Ty nie tot Wade kan deurdring nie.
Woensdag 5 Januarie
Susan verdedig Elana en dit gee haar hoop, of verstaan Elana haar bedoelings verkeerd? Nazeem is onder druk, terwyl Wade by Kate aanklop vir hulp.
Donderdag 6 Januarie
Elana en Susan se skeisaak neem ’n nuwe wending, terwyl Greg sukkel met onttrekkingsimptome. Wade vra iets onverwags van Ty.
Vrydag 7 Januarie
Bridgette nooi Greg vir ’n braai, terwyl Elana sake finaal met Susan uitklaar. Wade sukkel nadat hy nie kontak met sy oorlede ouers kon maak nie.
Getroud met rugby
Weekdae om 18:00 op kykNET
Maandag 3 Januarie
Maryke beplan ’n verrassingspartytjie vir Bibi se 40ste verjaardag. Nico voel ongemaklik oor Lulu en Simon se vriendskap. Die Griesel-dames wys waarvan hulle gemaak is.
Dinsdag 4 Januarie
’n Ongenooide gas daag by Simon se verjaardagete op. Maryke loop op eiers rondom Bibi. Nesie en haar familie lek hulle wonde.
Woensdag 5 Januarie
Nesie het ’n verrassing vir Buks. Bibi en Maryke is by ’n kruispad. Yvonne is onrustig oor Lulu en Nico.
Donderdag 6 Januarie
Maryke probeer om dinge tussen haar en Bibi reg te stel. Lulu besef sy en Simon kan nie vriende wees nie. Ryno sukkel om weer enkellopend te wees.
Vrydag 7 Januarie
Dis Fafa en sy groep se laaste vertoning in Pottie’s. Simon wroeg oor sy gevoelens vir Lulu. Amanda rig ’n gevaarlike versoek aan Schalk.
Arendsvlei
Maandag tot Donderdag om 19:30 op kykNET&kie
Maandag 3 Januarie
Langes besef hy sal Eva dringend uit Mario se kloue moet red. Ronel maak ’n besluit oor haar verhouding met Nolan, terwyl die dansspan ʼn nuwe kaptein kry.
Dinsdag 4 Januarie
Langes probeer vir Eva die waarheid omtrent Mario wys. Clint en Beatrice se nuwe lewe is nie so sorgvry soos hulle dink nie. Ingrid sukkel om te fokus op haar verhouding met Lennie.
Woensdag 5 Januarie
Ingrid raak verveeld van haar normale lewe en begin soek na opwinding. Nolan gee voor dat hy beter is, maar Daniel maak vir Ronel agterdogtig oor Nolan se vordering.
Donderdag 6 Januarie
Lennie neem groot besluite. Beatrice en Clint se toekoms lyk rooskleurig. Debra en Langes bevind hulle in ʼn baie gevaarlike situasie.
