‘The Voice SA’: Nog ʼn stem-fiasko

Die Top 7 van die The Voice SA. Foto: The Voice SA/Facebook

M-Net het aangekondig dat nie een van die vyf oorblywende deelnemers aan The Voice SA komende Sondag huis toe gestuur sal word nie en dat die twee deelnemers wat die afgelope twee weke uitgestem is, kan terugkom.

M-Net het in ʼn verklaring gesê Luke Lovemore en PJ Pretorius, wat die afgelope twee weke die minste stemme gekry het, is die opsie gegee om verder aan die program deel te neem.

“Die besluit is geneem in die belang van regverdigheid en deursigtigheid nadat M-Net ingelig is oor beweerde betaalde bemarkingsopsies op sommige van die deelnemers se persoonlike sosiale media-profiele,” het M-Net gesê.

Die betaalde bemarkingsopsies verwys na sogenaamde “boosted posts” op Facebook waar ʼn gebruiker kan betaal om te verseker dat sy inskrywing deur meer mense gesien word. “Betaalde bemarkingsopsies is teen die reëls van die kompetisie en kan veroorsaak dat daar ʼn piek in die stemmery is wat gevolglik ʼn onregverdige voordeel kan veroorsaak.”

Volgens M-Net is ʼn ondersoek van stapel gestuur om vas te stel hoe dit moontlik die uitkoms van die stemmery kon beïnvloed. “Daar is vasgestel dat die afgelope twee stemperiodes, waartydens Lovemore en Pretorius uitgestem is, hierdeur geraak kon word.”

M-Net het gesê hulle kon egter nie met sekerheid vasstel of enige wangedrag plaasgevind het nie. “Ons glo die regverdigste oplossing in die omstandighede is om al die deelnemers wat geraak word nog ʼn kans te gee,” het Nkateko Mabaso, hoofbestuurder van M-Net Suid-Afrika, gesê.

Die wenner van The Voice SA sal deur die publiek se stemme beslis word en op Sondag 9 Julie aangekondig word.

Kykers het intussen verdeeld op die aankondiging van M-Net gereageer. Talle aanhangers is oorstelp dat Lovemore en Pretorius gaan terugkeer na die program terwyl ander meen M-Net moet kykers vergoed met lugtyd vir die stemme wat uitgebring is aangesien dit in wese nou geen verskil maak nie.

Dit is nie die eerste keer dat die stemproses hewige reaksie uitlok nie. Richard Stirton is verlede jaar as die wenner van The Voice SA aangewys nadat M-Net besluit het om nie die Sondagaand voor hy gewen het se stemme in berekening te bring nie. Slegs die stemme wat teen die Donderdagaand ontvang is, is getel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

39 Kommentare

jongste oudste gewildste
Marinda van Zyl

The Voice SA is pateties!!!!!
Gavin Edward het nie in Seisoen ‘n regverdige kan gehad om te wen nie en NOU ALWEER STEMME WAT FOUTIEF IS.

MH

As ek so luister na die deurmekaarspul en kommentare is ek maar bly dat ek nog nooit na enige episode van dié spul gekyk het nie.

Riana

Ek is so bly Luke en P J kan terug kom, vir my is hul saam Caroline en Fatman die top vier!

Amanda

The Voice is baie beter as die Idols. Deelnemers word nie afgekraak nie en beoordelaars is professioneel, behalwe Bobby wat soos ‘n kind aangaan. Ons land het baie talent.

Elsa

Is dit werklik ‘n fiasko of maar net ‘n geldmaak sessie??