Argieffoto (Foto: Hermann Traub/Pixabay)
Die volgende gedig is gekies vir publikasie in die AVBOB Poësiebiblioteek en word heruitgegee met die toestemming van die AVBOB Poësieprojek . Om dié biblioteek van meer as 18 000 gedigte in al 11 landstale te besigtig, klik hier.
“die dromer” deur Theo Erns Botha
daar drentel hy deur die doringdraad-gat
dan oor die treinspoor —
kyk nie links of regs nie —
in sy bruin vellies
kamma glimlag in sy kies
daar drentel hy deur die doringdraad-gat
aan die anderkant —
draai sy neus
na die sonneblom in die lug
glimlag in sy kies
daar drentel hy
met sy tassie in sy linkerhand
en sy jassie op sy rug
en sy kombersie in sy regterhand
sy vellies: sleep-sleep oor die tolbosse
daar doer drentel hy dan steeds:
sy figuur oor die horison
ʼn sirkel wat radius verloor
nou amper net ʼn spikkel
- Ter wille van die konteks van hierdie gedig en ter wille van erkenning aan die bron versoek ons dat jy nie bloot net ʼn skermskoot van hierdie gedig op sosiale media sal deel nie, maar eerder die skakel van die Toetentaal-plasing sal gebruik. – Red
