Gedagte vir die dag: God sal nie vergeet nie

Argieffoto (Foto: Aperture Vintage/ Unsplash)

“Die behoeftiges word nie vir altyd vergeet nie, en die hoop van die armes sal nie vir altyd vernietig word nie.” (Psalm 9:19)

Skrifgedeelte
Psalm 9:19 (NLV)

Oordenking
Soms dink mense dat God hulle vergeet het, maar God sal nie en kan nie vergeet nie. Veral nie as dit oor “behoeftiges” of “magteloses” – soos Dawid hier sê – gaan nie. God staan juis by almal wat behoeftig is en op Hom staatmaak.

Waarom moet ons dan soms so lank op Hom wag? Dink aan geloof as saad wat jy saai. As jy jou vertroue op die Here plaas, beteken dit nie dat daar dadelik ʼn antwoord gaan kom nie. O nee, tussen die saaityd en die oestyd is daar verskeie seisoene. Dit lyk dalk asof daar niks op ʼn gesaaide land gebeur nie, maar die werklikheid is dat so ʼn land vol potensiaal is. Dinge gebeur wel, maar dis onsienbaar, onder die grond. Onthou, elke seisoen is nodig. Nee, God het jou nie vergeet nie, maar Hy wil meer met jou doen as wat jy dink. Saai solank geloof, want jy sal vir seker maai!

Gebed

God, help my om getrou te bly glo. Ek wag getrou op u tyd. Dit sal kom! Amen.

• Hierdie oordenking verskyn in Mini-Oordenkings: Hoop vir elke dag deur Jimi le Roux. Dit word goedgunstiglik deur die Christelike Uitgewersmaatskappy/CUM verskaf.