Argieffoto (Foto: Guillaume de Germain/Unsplash)
“Mag Hy jou hartsbegeertes vervul en al jou planne verwesenlik.” (Psalm 20:5)
Skrifgedeelte
Psalm 20:5 (NLV)
Oordenking
Wat ʼn pragtige seënbede wat oor my en jou uitgespreek word! Onthou, ʼn seën (in Jesus se Naam), wat in geloof uitgespreek en in geloof aanvaar word, is ʼn kragtige bevestiging van God se goedheid. Dit kan lewens verander.
Dink aan die effek wat dit gehad het toe ʼn volwassene of onderwyser vir jou as kind jou sterkpunte uitgewys het of jou verseker het dat jy suksesvol sal wees. Dit het jou aangespoor, nie waar nie? Sulke uitsprake bly jou by en maak jou sterk. Net so ook as iemand namens God sê: “God het jou lief, God sal vir jou sorg, God sal jou voornemens laat geluk.” Sulke woorde het geweldige krag! Seën ander mense ook op dié wyse.
Gebed
Vader, maak my woorde ʼn seën – nooit ʼn vloek nie. Amen.
- Hierdie oordenking verskyn in Mini-Oordenkings: Hoop vir elke dag deur Jimi le Roux. Dit word goedgunstiglik deur die Christelike Uitgewersmaatskappy/CUM verskaf.
