Dié pastagereg is perfek vir jou gesinstafel.
Lewer 8 porsies.
Bestanddele
- 500 g (2 bokse) lasagnevelle
Maalvleislaag
- genoeg Clover Farmstyle-botter
- 2 uie, gekap
- 3 selderystingels, gekap
- 30 ml (2 e) vars pietersielie, gekap
- 700 g beesmaalvleis
- 2 wortels, grof gerasper
- 820 g (2 x 410 g-blikke) gekapte tamaties
- 125 ml (½ k) rooiwyn
- 100 g (2 x 50 g-blikkies) tamatiepasta
- 10 ml (2 t) worcestersous
- 2,5 ml (½ t) sout
- 1 ml swartpeper
- 30 ml (2 e) suiker
- ekstra Clover Farmstyle-botter
Kaassous
- 80 g Clover Farmstyle-botter
- 80 ml (⅓ k) koekmeel
- 750 ml (3 k) warm Clover-volroommelk
- 2,5 ml (½ t) sout
- knippie rooipeper
- 375 ml (1½ k) Clover-cheddarkaas, gerasper
Metode
- Voorverhit die oond tot 180 °C.
- Smelt genoeg botter en braai die uie, seldery en pietersielie totdat die uie sag is.
- Voeg die maalvleis by en braai tot die maalvleis gaar en los van mekaar is.
- Voeg die wortels, tamaties, rooiwyn, tamatiepasta, worcestersous, sout, peper en suiker by.
- Laat prut oor medium hitte vir 20 minute sonder ’n deksel sodat van die vloeistof kan verdamp.
- Smeer ‘n diep oondbak van ongeveer 32 cm x 22 cm goed met botter.
Kaassous
- Smelt die botter en koekmeel saam in ʼn kastrol.
- Giet die warm melk bietjie-vir-bietjie by terwyl die witsous met ʼn ballonklitser geroer word. Hou aan roer tot al die melk bygevoeg is.
- Laat kook vir 2 tot 3 minute tot die witsous verdik is. Haal van die stoofplaat af. Roer die sout, rooipeper en 250 ml (1 k) van gerasperde kaas by.
- Skep ʼn bietjie van die witsous op die bodem van die gesmeerde oondbak.
- Pak lasagnevelle op die bodem van die hele bak.
- Skep ʼn derde van maalvleismengsel bo-op, gevolg deur ʼn lagie lasagnevelle en witsous. Herhaal hierdie lae nog twee keer sodat lasagne drie maalvleis-lae het.
- Sprinkel die oorblywende cheddarkaas bo-oor en bak vir 40 minute of tot die toetspen deur die lasagnevelle kan steek.
- Sit warm voor saam met ʼn slaai.
Bron: Onthoukos
Uitgewer: Lapa