Resep: Pikante hoender-en-lensiesop

Pikante hoender-en-lensiesop. (Foto: Lapa Uitgewers)

ʼn Heerlike beker sop is nie te versmaai in hierdie winterkoue nie.

Lewer 6 porsies.

Bestanddele

• 375 ml rooi lensies
• 15 ml kanola-olie
• 1 groot ui, fyngekap
• 2 selderystingels, gekap
• 1 wortel, gekap
• 2-3 knoffelhuisies, fyngekap
• 1 heel hoender, in porsies gesny
• 10 ml fyn komyn
• 2,5 ml rooipeper
• 1 ℓ hoenderaftreksel
• 1 ℓ water
• 2 x 410 g-blikkies gekapte tamaties
• sout en varsgemaalde swartpeper na smaak

Metode

1. Spoel die lensies onder koue Iopende water af en hou eenkant.
2. Verhit die olie in ‘n swaarboomkastrol en braai die ui, seldery, wortel en knoffel liggies vir 5 minute of tot die groente effens sagter word.
3. Voeg die hoender, komyn en rooipeper by. Braai die hoenderporsies vir 5-7 minute of tot die hoendervleis begin verbruin.
4. Voeg die aftreksel, water en tamaties by. Verlaag die hitte en laat die sop liggies kook vir 15-20 minute of tot die hoender gaar is.
5. Skep die hoenderporsies uit en voeg die lensies by die sop. Laat dit vir 15-20 minute kook of tot die lensies gaar is.
6. Sny die hoendervleis in klein stukkies en skep dit terug by die sop.
7. Laat die sop vir nog 5 minute liggies prut, geur na smaak en bedien saam met vars broodrolletjies.

Bron: 50 Hoendergeregte
Uitgewer: Lapa