Nuuskommentaar: Spur se ommekeer

Argieffoto

Hopelik sal die stof wat die sogenaamde Spur-voorval betref nou gaan lê met Spur se skielike ommekeer oor die saak, en onderneming om voortaan eers vas te stel wat gebeur het voor hy optree. Die land het nie nog gevalle nodig waar in rassevoorvalle onewehandig opgetree word nie.

Die sogenaamde Spur-voorval, en veral Spur se reaksie daarop, het op die allerslegste tyd (vir Spur) gekom om ’n politiek korrekte standpunt in te neem deur onewehandig in ’n rassevoorval op te tree.

Of miskien het Spur geoordeel dit is die regte oomblik wat in sy skoot geval het om sy swart klantebasis uit te bou.

Dit het naamlik min of meer saamgeval waar Solidariteit en AfriForum verskeie stappe gedoen het om die regering en onder meer die Menseregtekommissie in wese as rassisties bloot te lê deur klagtes teen wit mense met groot erns aan te pak, en enorme boetes op te lê, terwyl baie swart mense wat erger dinge kwytgeraak het glad nie aangespreek is nie, of bloot liggies oor die vingers getik is.

Boonop is pres. Jacob Zuma een van die mense wat verkla is, maar oor wie die Menseregtekommissie skynbaar ’n yslike wind gesluk het nadat daar tekens en ’n belofte van vordering was.

Voorts het Zuma en sy kornuite met ’n slagspreuk gekom oor “wit monopolie op kapitaal” wat glo deur die Britse beeldpoetser, Bell Pottinger, ontwerp is. Heel duidelik het dié firma, met Gupta-bande, die Pottinger heeltemal misgesit.

In die Spur-voorval het ’n wit pa ’n swart ma woedend gekonfronteer omdat, volgens die pa, die ma se kind sy kind geklap het. Die ma het nie op haar laat wag nie, maar laat waai om die pa die kop te was.

Of die voorval dieselfde sou verloop het as albei ouers wit, of albei swart was, weet ’n mens nie. Spur het sonder ’n “verhoor” (sy eie woorde) besluit die pa is die skuldige en hom alle Spur-takke belet. Die ma is om verskoning gevra.

Dit het gou tot ’n boikotaksie teen Spur gelei. Die Front Nasionaal was blykbaar die leidende party hier, maar volgens Daily Maverick was dit nie duidelik wie agter die Facebookblad gesit het wat die boikot ondersteun het nie. Duisende mense het hul “likes” vir die boikot aangedui.

Kort voor lank het Spur miljoene rande verloor. Spur het lank rug styfgemaak en onder meer aangevoer dis net enkele takke wat deur die boikot geraak word.

Solidariteit is in ’n ope brief van Spur daarvan beskuldig dat dit “implisiet” die boikot steun. Dr. Dirk Hermann, bedryfshoof van Solidariteit, het verduidelik nóg hy nóg Solidariteit as beweging steun die boikot, hy self het net as gevolg van die voorval sy smaak verloor om by Spur te eet. ’n Oor-en-weer-skrywery volg, met Spur wat steeds die rug styfmaak.

Spur stel ’n taakspan aan, en nooi onder meer vir Solidariteit om ’n voorlegging te doen. Solidariteit wys dit van die hand omdat, volgens hom, die samestelling van die taakspan op bevooroordeeldheid wys.

En toe, gister, verander Spur sy deuntjie ten volle. Die taakspan word op die ys geplaas, en die topbestuur sal die takke (bedryfsregte) besoek en by die konsessiehouers en klante verneem na hoe om die pad vorentoe te loop.

Verskoning word onvoorwaardelik aan almal wat op ’n manier geraak is, aangebied. Niemand sal weer sonder ’n verhoor soos die pa behandel word nie.

Het Spur nou genoeg gedoen, of gaan dit in die instelling van die opklaringsaksie genoeg wees om weer sy ou plek as gesinskuierplek in te neem?

Die hartseerste is stellig dat van die bedryfsregte die seerste gekry het. Dit is konsessiehouers wat in wese hul eie ondernemings bedryf (teen ’n koste aan Spur), en toe benadeel is deur die optrede van Spur. Dit blyk dat 150 van die 300 Spur-takke se konsessiehouers Spur se topbestuur onder druk geplaas het om ’n ander benadering te volg. Die topbestuur het saamgestem.

Die belangrikste les wat Spur uit die saak moes leer, is dat al word dit as hoe politiek korrek beskou, rassesituasies nie onewehandig hanteer kan word nie. So iets rig nie net skade aan Spur aan nie, maar dra by tot die rassepolarisasie wat grootliks deur Zuma en trawante aangestig word.

Spur het ook nou die belangrike les geleer – “the client is always right”.

Dit beteken nie ’n klant wat rassisties optree, moet skotvry daarvan afkom nie, maar daar moet minstens agter die kap van die byl gekom word om te bepaal wie die skuldige party is, en dan daarvolgens opgetree word.

Dit het Spur nou onderneem om te doen.

Om Zuma na te praat en na te doen, is lankal nie meer die regte ding nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

160 Kommentare

jongste oudste gewildste
Rynhardt

Ek wonder of Dirk Herman sy aptyt vir heerlike spur-burger terug gekry het??Net jammer daar was landwyd nie so n oprukking teen regstellende aksie nie!!

Dellaq

Goed gese. Baie waar.

Disselboom

Dankie vir die lekker Afrikaanse woord: “bedryfsregte” pleks van “franchise”. En nogeens ‘n goeie bydrae om die lewe om ons vandag te probeer verstaan.

Alta van der Sandt

Ek sê weer. Heeltemal te min heeltemal te laat. Ek sal nooit weer Spur ondersteun nie.

Johan Grobler

Ongelukkig is dit ‘n geval van “Too Little, Too Late” – Ek bly steeds weg van hierdie eetplek asook al sy affilliate. Gaan doen maar self julle huiswerk om te sien wie dit is.