Die kwessie van plaasaanvalle is op ʼn spits gedryf met die wrede moord op die jong plaasbestuurder Brendin Horner twee weke gelede. Die gemoedere het hoog geloop by die eerste hofverskyning van die twee verdagtes, met honderde boere en ander gemeenskapslede wat by die hof opgedaag het. Pres. Cyril Ramaphosa, wat tot dusver grootliks stil was as dit kom by plaasaanvalle, het kort daarna in sy weeklikse nuusbrief gesê Horner se dood mag Suid-Afrikaners nie onaangeraak laat nie – net soos dié van enige geweldsmisdaad in Suid-Afrika.
Individue en organisasies se reaksie hierop was heftig, en het nie net die probleem van plaasaanvalle nie, maar ook van geweldsmisdaad in Suid-Afrika opnuut onder die vergrootglas geplaas. Daar is dié wat van mening is – soos pres. Ramaphosa – dat plaasaanvalle nie uitgesonder behoort te word nie omdat die klem eerder daarop moet val om die algemene kultuur van geweldsmisdaad in Suid-Afrika te takel. Ander reken daar is meer as genoeg rede om ʼn gefokusde benadering tot die hantering van plaasaanvalle te volg as gevolg van onder meer die rol wat boere en hul werkers in die land se ekonomie speel.
In Maroela Media se regstreekse gesprek om 15:00 vandag gaan ons poog om dié kwessie te ontrafel. Waar staan ons met betrekking tot geweldsmisdaad in Suid-Afrika? Wat maak ʼn gewelddadige aanval op ʼn plaas anders as ʼn gewelddadige aanval in ʼn stad of ʼn informele nedersetting? Speel aspekte soos loon- en arbeidsgeskille, die afgesonderdheid van plase, toegang tot waardevolle eiendom, en, les bes, rasgedrewe motiewe, ʼn rol wanneer dit by plaasaanvalle kom?
Daar is ook vrae wat gevra moet word oor die impak van plaasaanvalle op die groter Suid-Afrika. Watter impak het dit op landbou in SA, en wat is die potensiële impak hiervan op SA vorentoe?
Belangrike kwessies wat ook bespreek moet word, is hoe die pad vorentoe lyk. Wat behoort gedoen te word deur die regering asook deur privaat instansies en deur die gemeenskap self?
Paul Maritz gesels regstreeks oor hierdie en ander moeilike kwessies aangaande geweldsmisdaad in SA en spesifiek plaasaanvalle met dr. Pieter Mulder, voormalige lid van die parlement en leier van die VF Plus, en dr. Johan Burger, konsultant by die Instituut vir Sekerheidstudies (ISS). Volg die regstreekse uitsending van hierdie gesprek Woensdag 14 Oktober om 15:00 op Maroela Media se Facebook-blad. Die video sal ook onderaan hierdie artikel beskikbaar wees.
