’n Gemotoriseerde oprithek het Woensdag op ’n bejaarde man van La Lucia, Durban, geval terwyl hy besig was om dié hek se motor te herstel.
Die 82-jarige man het glo sy balans verloor voordat die hek bo-op hom in sy oprit beland het.
Shawn Herbst, woordvoerder van Netcare 911, sê paramedici is vanoggend net voor 11:00 na die bejaarde se huis ontbied. Veiligheidsbeamptes van Marshall Security het in dié stadium reeds op die toneel aangekom en kon die man van onder die hek bevry en noodhulp op hom toepas.
Andreas Mathios, woordvoerder van Marshall Security, sê die man was by die beamptes se aankoms onder die staalhek vasgepen.
Paramedici het die man ondersoek en bevind dat hy matige beserings in die voorval opgedoen het. Hy is op die toneel gestabiliseer voordat hy per ambulans na ’n nabygeleë hospitaal vervoer is vir verdere mediese behandeling.
Sterkte, oom!
Sterkte, ek is bly die oom het nie baie seergekry nie.