Die speurtak in Bloemspruit, Vrystaat, ondersoek die moord van ’n 50-jarige man, wat ’n personeellid van die Centlec se ingrypingspan in die Mangaung-metropolitaanse munisipaliteit, was. Centlec is die kragverspreider van die Mangaung-metro.
Die slagoffer is as David Khanda geïdentifiseer.
Volgens lt.kol. Thabo Covane, polisiewoordvoerder, het die personeellid Saterdag omstreeks 21:30 by sy huis in Cuban-straat in Pine Haven, Bloemspruit, aangekom.
“Die gesin het geweerskote gehoor en is uit om te gaan kyk wat aangaan,” sê Covane.
“Die lede van die gesin het die personeellid, wat die hoof van die gesin was, op die grond aangetref.”
Die polisie en paramedici is na die toneel ontbied, waar hulle die slagoffer met verskeie skietwonde aangetref het. Hy is op die toneel dood verklaar.
’n Saak van moord is by die Bloemspruit-polisiestasie aanhangig gemaak. Die verdagte(s) is nog op vrye voet.
“Enigiemand met meer inligting wat tot die verdagte(s) se inhegtenisneming kan lei, kan konst. Sechaba Tsholo by 082 854 7532 kontak of die Stop Misdaadnommer by 08600 10111 skakel.
Lele Mamatu, woordvoerder van Centlec, sê hulle is geskok oor Khanda se dood. Hy beskryf Khanda as ‘n hardwerkende en toegewyde werker.
“Ons hoop die skuldiges word gou vasgetrek,” sê Mamatu.
Ek wonder wat sê Hoedman van hierdie sinnelose moord? Mag David se gesin vertroosting vind.