‘n Gemotoriseerde hangsweeftuig het glo in die see by Reebok gestort. (Foto: Twitter / MosselBay Advertiser)
Die lugvaart-soek-en-reddingskoördineringsentrum, Aeronautical Rescue Coordination Centre (ARCC), is tans besig met ʼn soektog na ʼn hangsweeftuig wat Maandagoggend na bewering in die see by Reebok naby Mosselbaai gestort het.
Luidens die ARCC se verklaring is die hangsweeftuig in die lug in die omgewing tussen Klein Brak- en Grootbrakrivier gewaar. Dit het bokant die water gesirkel voordat dit glo in die see gestort het.
Mossel Bay @NSRI members have been deployed to Reebok after a hang glider allegedly crashed into the sea on Monday morning. Search and rescue members are on the scene. This is a developing story. Pic: @MBAdvertiser pic.twitter.com/L6sgHwO3Ll
— AlgoaFMNews (@AlgoaFMNews) September 19, 2022
Reddingshelikopter help soek na vermiste hangsweeftuig https://t.co/zQqD3uJvPO pic.twitter.com/xAsD31vP0L
— MosselBay Advertiser (@MBAdvertiser) September 19, 2022
André Fraser, stasiebevelvoerder van die Nasionale Seereddingsinstituut (NSRI) op Mosselbaai, het Maandag aan Maroela Media bevestig dat ʼn inwoner die NSRI omstreeks 06:50 ontbied het. Volgens die inwoner het hy die voorval gesien toe hy by sy huis in Kusweg uitgestap het.
Gregory Critchley, hoof van die ARCC, dui in dié sentrum se verklaring aan dat verskeie nooddiensspanne, onder wie die NSRI-Mosselbaai, polisieduikers, Eden Metro-rampbestuur en -nooddienste, Skymed AMS, MRCC en ʼn private lugtuig, ʼn soektog onderneem het in die gebied waar die hangsweeftuig aanvanklik gewaar is. Die soektog het tot dusver niks opgelewer nie.
“Die soektog duur voort en meer inligting sal bekend gemaak word soos dit beskikbaar is,” het Critchley gesê.
Hou Maroela Media dop vir meer inligting soos die gebeure ontvou.
