Kollegas ondersteun ginekoloog ná skuldigbevinding

Die ginekoloog dr. Danie van der Walt in die Witbank-streekshof. Foto: ANA

Die Suid-Afrikaanse Vereniging van Verloskunde en Ginekologie (Sasog) het Dinsdag hul misnoeë te kenne gegee met ʼn uitspraak in die hooggeregshof waar die skuldigbevinding en vyfjaartronkstraf van dr. Danie van der Walt bevestig is.

Van der Walt se aansoek om appèl is verlede week in die Pretoriase hooggeregshof afgekeur. Hy is in September 2016 in die Witbank-streekhof skuldig bevind op aanklag van strafbare manslag in verband met die dood van een van sy pasiënte.

Die raad vir gesondheidsberoepe in Suid-Afrika (HPCSA) het hom ook beveel om ʼn skulderkenningsboete van R10 000 te betaal.

Van der Walt het tydens sy aansoek om appèl gesê sy vonnisoplegging is “skokkend onvanpas”. Hy het intussen aangedui hy sal nou die hoogste hof van appèl nader.

Sasog het in reaksie gesê “sonder toegang tot die volle uitspraak”, neem hy “met kommer kennis” dat die hooggeregshof die appèlaansoek afgekeur het. “Ons betreur die afsterwe van die jong ma weens komplikasies ná ʼn normale geboorte en ons betuig ons innige meegevoel met die familie wat ʼn ma, suster en dogter verloor het,” het die organisasie bygevoeg.

Sasog het gesê hy ondersteun alle pogings om die verlies van lewe tydens bevallings te voorkom en die organisasie se program, om uitnemendheid in verloskunde te bevorder genaamd BetterObs, is in meeste privaat instansies in Suid-Afrika ingestel.

“Suid-Afrikaanse professionele persone is oor die algemeen bekend vir hul uitnemendheid en ons privaat gesondheidsorgbedryf is van wêreldgehalte,” het Sasog in ʼn verklaring gesê. “Verloskunde is ʼn spesialiteit met ʼn hoë risiko vir ʼn slegte uitkoms vir ma en kind wat nie altyd voorkom kan word nie. Die gepaardgaande regsmediese risiko’s het daartoe gelei dat verskeie spesialiste reeds die bedryf verlaat het.”

Sasog sê in gevalle waar daar ʼn slegte uitkoms was en vermoedelik kliniese nalatigheid, moet dit ondersoek word en die organisasie respekteer die bevindings en uitsprake in die hof. Die vonnisoplegging in Van der Walt se geval “is egter kommerwekkend weens die presedent wat geskep word en die impak op die behoefte aan vaardighede in ons land en die effek op die individuele dokter, sy gemeenskap en die mediese en verloskundige bedryf”.

Die organisasie het gesê hy het ook ernstige kommer oor toenemende eise wat betref mediese wanpraktyke. “Ons sal ons lede bly ondersteun en die beste moontlike oplossings soek om geregtigheid te laat seëvier en restitusie te verseker vir diegene wat skade gely het weens mediese behandeling – of dit kliniese nalatigheid was of nie.”

Maroela Media het vroeër berig Pamela Daweti (23) is dood toe sy in 2005 in die Life Cosmos-hospitaal in Witbank geboorte gegee het. Haar baba het oorleef.

Landdros Marlene Greyvenstein het tydens die vonnisuitspraak gesê Daweti se dood kon verhoed gewees het indien Van der Walt by die hospitaal gebly het om na die pasiënt om te sien. Deweti het gebloei nadat sy geboorte gegee het, maar Van der Walt het die hospitaal verlaat.

Greyvenstein het ook tydens haar uitspraak genoem dat Van der Walt geen berou getoon het tydens die verloop van die verhoor nie, maar het gesê sy het in ag geneem dat Daweti se bloeding nie noodwendig deur Van der Walt veroorsaak is nie. “Daar is geen bewyse dat die bloeding, wat die oorsaak van Daweti se dood was, noodwendig deur dr. Van der Walt veroorsaak is nie,” het Greyvenstein gesê.

Van der Walt is in Julie 2017 gevonnis.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

91 Kommentare

jongste oudste gewildste
Andreas

Voortydig en suiwer uit soos dit hier bo berig is, vertrou ons dit skrik ander so af dat dit nooit ooit weer van ‘n Dokter gesê kan word nie. As jy jou handskoene uitgetrek het, beteken dit dan jou taak is afgehandel?

Johann M van Heerden

Kommerwekkende uitspraak en situasie. Dit skep ‘n gevaarlike president. Ken nie besonderhede van die saak nie, maar nogtans. Daar gaan soveel ander opsetlike dade ongestraf in die wye droewe land. Maar ons huidige owerhede krap alewig waar dit nie jeuk nie en kyk die groot sake mis.

Harrie

Wanneer jy prof diens lewer en prof fooi vra dan hou jy daarby…daar is ‘n arrogansie by baie van ons prof persone wat aangespreek moet word…

Buks Barnard

Hierdie is ‘n uiters onregverdige uitspraak en vonnis en nog ‘n bewys dat die regstelsel in hierdie land ook tot rommelstatus teruggesak het.

C

Ek weet van ‘n sekere ginekoloog toe my suster hulp nodig gehad het met haar ongebore kind wat daar komplikasies was het die dokter reguit vir haar gesê jammer mevrou ek ek haal nie dooie kind uit nie en op die doodsertifikaat het hy geskryf stilgebore en dis ‘n meisiekind wat nie eers ‘n meisiekind was nie maar ‘n seuntjie was. Hy was nie eers by met die geboorte nie nadat sy 4 induksies gehad het. Skokkend hoe sommige ginekoloe kan wees geen gevoelens net in vir die geld. En dit was ‘n privaat dokter nie eers staat nie. ?