‘n Driejarige kind het in die ongeluk in die Pinetown-omgewing gesterf. (Foto: ALS Paramedics)
ʼn Driejarige dogtertjie is dood en haar sewejarige boetie in ʼn bedenklike toestand ná ʼn ongeluk Dinsdag op die N3 in die omgewing van die Mariannhill-tolhek.
Garrith Jamieson, woordvoerder van ALS Paramedics, sê die ongeluk het kort voor 13:00 tussen ʼn vragmotor, ʼn bakkie en ʼn ligte motor in die omgewing van Pinetown plaasgevind.
Die twee kinders was vermoedelik agterin die bakkie toe die ongeluk gebeur het.
‘n Sewejarige seuntjie is met ‘n helikopter van Netcare na ‘n hospitaal gevlieg. (Foto: ALS Paramedics)
ʼn Helikopter van Netcare 911 is inderhaas na die toneel gestuur om die dogtertjie na ʼn hospitaal te vlieg. Haar hart het egter op die toneel gaan staan en ten spyte van talle pogings om haar by te bring, is sy op die toneel dood verklaar.
Haar boetie is daarna met die helikopter na ʼn hospitaal gevlieg.
Die polisie ondersoek die ongeluk.
