Prof Anton Harber het Maroela Media gesels oor sy boek “So For the Record” wat gekyk het na ondersoekende joernalistiek in die era van staatskaping. (Foto: Jonathan Ball Publishers)
Anton Harber, veteraanjoernalis en Caxton-professor in joernalistiek aan die Universiteit van Witwatersrand, het sy ondersoekende kennis van 40 jaar ingespan om sy eie beroep se aandeel in die era van staatkaping te ondersoek.
Harber het vir twee jaar tientalle onderhoude gevoer met politici, joernaliste, polisiemanne en fluitjieblasers voordat hy twee merkwaardige verhale oor joernalistiek in dié tyd saamgevoeg het. En dit lees soos spioenasieriller.
Die eerste is ʼn ysige verhaal van die sogenaamde Cato Manor-moordbendesaak en ʼn korrupte ondersoekeenheid in die Suid-Afrikaanse Inkomstediens, wat kwansuis ʼn bordeel bedryf het. Daarby ook hoe een van Suid-Afrika se voorste koerante bedrieg is om die vuil werk van politici te doen.
Die tweede verhaal begin met ʼn gebreekte hardeskyf wat ná talle amper misgeloopte geleenthede lei tot die ontbloting van die diepte van die invloed van die Guptas op die regerende party.
Harber het die fassinerende stories vertel agter die opskrifte en die joernaliste wat daarvoor gesorg het. Dit is allermins akademies en hy weef ʼn storie soos ʼn ordentlike spanningsverhaal sonder om in te veel besonderhede vas te val.
Die twee verhale onthul die laagte- en hoogtepunte van ondersoekende joernalistiek tydens era van staatskaping.
Harber het met Maroela Media gesels oor sy boek So For the Record – Behind the Headlines in an Era of State Capture en die ondersoeke daarvoor.
- Luister na die volledige onderhoud bo-aan hierdie berig.
- So For the Record – Behind the Headlines in an Era of State Capture is deur Jonathan Ball Publishers uitgegee en kan by Graffiti-boeke bestel word.
Harber het die fassinerende stories vertel agter die opskrifte en die joernaliste wat daarvoor gesorg het. (Grafika: Jonathan Ball Publishers/Facebook)
