Makelaar vas oor bedrog, vervalsing

sanlam_logoFrancois Labuschagne (49), ʼn voormalige versekeringsmakelaar van Sanlam, het Dinsdag vlugtig in die gespesialiseerde handelsmisdaadhof in Bellville verskyn op aanklag dat hy die Wet op Finansiële Advies- en Tussengangerdienste (FAIS) oortree het.

“Labuschagne word daarvan beskuldig dat hy beleggingskliënte bedrieg het met bedrae ter waarde van net minder as ʼn miljoen rand,” het kapt. Lloyd Ramovha, woordvoerder van die Valke, gesê. “Die beweerde oortredings het tussen 2005 en 2010 in Ceres in die Wes-Kaap plaasgevind.”

Hy het glo bejaarde persone geteiken en hulle aangeraai om groot bedrae uit ʼn portefeulje te onttrek wat na bewering nie presteer het nie, om dit na ʼn beter portefeulje oor te plaas. Hy het dan die kontant gevat onder die voorwendsel dat hy dit in Sanlam se besigheidsrekening sou deponeer, maar het dit vir sy eie persoonlike gewin gebruik. Interne forensiese ondersoeke het tot sy afdanking in 2010 gelei en hy was sedertdien voortvlugtig.

“Labuschagne is op 15 Januarie by sy wegkruipplek in Louis Trichardt in Limpopo aangekeer, toe speurders van die dorp in samewerking met die Valke van die Wes-Kaap hom in hegtenis geneem het. Hy het vlugtig in die plaaslike hof verskyn waar die saak tot vandag uitgestel is in die Bellville-hof,” het Ramovha bygevoeg.

Labuschagne staan tereg op aanklag van bedrog, vervalsing en die oortreding van die Wet op Finansiële Advies- en Tussengangerdienste (FAIS). Hy moet op 23 Februarie weer in die hof verskyn.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
popeye

Ek reken dis omdat sy bestuurders hom ook jaar tot jaar gedruk het vir meer en meer produksie om meer en meer vir die aandeelhouers te lewer. Kwantiteit bo kwaliteit! ‘n industrie van baie donker kante!

anna

Wat het van Alwyn Smit se saak geword. Dit was op Carte Blanch. Van my familie ingedoen en lewe van almal se bietjies. So hartseer dat hy kan wegkom hiermee.

popeye

Nie net geld jaag hierdie mense nie. Hulle word gereeld herinner dat geld moet invloei om waarde vir die aandeelhouers te lewer. Kwantiteit oorheers kwaliteit want die bedryf se belang is meer by aandeelhouers en top bestuur se bonusse as by die klient. As die makelaar nie “deliver” nie word hy ontslaan want hy produseer nie op die maatskappy se standaarde nie. Bewys…….hoë personeel omset in die bedryf.

Alida

En storieverteller Nico ????

Koos

Nee wat begrawe daai geld onder die appelkoosboom. Baie veiliger as aanlyn..