(Foto verskaf deur Rusa)
ʼn Man, in sy 30’s, is Saterdagoggend dood toe ʼn goederetrein hom in Rockford, KwaZulu-Natal, getref het.
ʼn Werknemer van ʼn privaat sekuriteitsmaatskappy het Reaction Unit South Africa (Rusa) omstreeks 07:37 gekontak en mediese bystand versoek.
Rusa-paramedici is dadelik ontplooi en die slagoffer is op die toneel dood verklaar. Hy het verskeie kopbeserings opgedoen en traumatiese beserings aan sy regterbeen. Sy regtervoet is geamputeer.
Volgens ʼn veiligheidsbeampte het die goederetrein die man omstreeks 04:00 getref. Hulle wou mediese hulp ontbied, maar was onsuksesvol. Hulle het daarna Rusa ontbied.
Omstanders het aan Rusa-beamptes gesê die oorledene is ʼn bekende dwelmgebruiker in die gebied.
