’n 51-jarige man van Kimberley in die Noord-Kaap is in hegtenis geneem nadat hy glo gedreig het om die hooggeregshof in die stad op te blaas.
Volgens Nomthandazo Mnisi, woordvoerder van die Valke, is inligting verlede week ontvang dat die verdagte op sosiale media gedreig het om die hooggeregshof te teiken.
“Die verdagte het beweer dat amptenare in diens van die hooggeregshof korrup is en het gedreig dat indien hulle nie voor Vrydag [16 Desember] in hegtenis geneem word nie, hy die hooggeregshof gaan opblaas,” sê Mnisi.
“Daar word verder beweer dat hy op sosiale media ʼn inskrywing geplaas het met foto’s van houers wat hy glo met petrol gaan vul om só die hof op te blaas.”
Lede van die Valke het ’n deursoek-en‑beslagleggingsoperasie by die verdagte se woning uitgevoer en daar is beslag gelê op bewyse wat die aanklagte ondersteun.
Die verdagte is Donderdag in hegtenis geneem en het Maandag in die landdroshof in Kimberley verskyn.
Hy word tans in die aanhoudingselle by die polisiestasie in die stad aangehou.