Ongeluk eis drie matrikulante

(Argieffoto: Pixabay)

Drie matrikulante van KwaZulu-Natal is Maandagoggend dood en drie ernstig beseer in ʼn motorongeluk ná ʼn “penne neer”-partytjie.

Die matrikulante was almal van Mnyamande High School, in die Amajuba-distrik, waar die ongeluk Maandag in die vroeë oggendure plaasgevind het. ʼn “Penne neer”-partytjie word gehou ná die matrieks hul laaste eksamen afgelê het en hulle hul penne uiteindelik kan neersit.

Muzi Mahlambi, woordvoerder vir die departement van onderwys, sê die beseerde leerders is in die hoësorgeenheid opgeneem. Volgens hom het die departement ook ʼn afvaardiging van beamptes na die distrik ontplooi om die families te besoek van die leerders wat gesterf het.

Imran Keeka, die DA se kieshoof in die gebied, het sy innige meegevoel aan die families en geliefdes van die slagoffers betuig.

Hy staan saam in geloof en bid vir die beseerde matrikulante.

“Ons doen ʼn beroep op die departement om vinnig die prosesse af te handel sodat die families berusting kan vind in hierdie tydperk van rou,” het Keeka bygevoeg. Hy rig dieselfde versoek aan die SAPD en verkeersdepartement om die ondersoek so vinnig as moontlik af te handel.

“Die DA versoek ouers, leerders en die groter gemeenskap opnuut om waaksaam te bly tydens ‘penne neer’-partytjies.”