Oud-polisielede kan weer aansoek doen

saps-sapd-polisie

Foto: SAPD/Facebook

Die waarnemende nasionale kommissaris van die Suid-Afrikaanse Polisiediens het ʼn heraanstelling van voormalige lede goedgekeur.

Dit geld lede in die rang van konstabel tot adjudant-offisier. Suksesvolle kandidate sal weer in die range aangestel word wat hulle vantevore in die SAPD beklee het, en sal vergoed word op die minimumsalariskerf wat tot hul betrokke rang van toepassing is.

ʼn Nasionale advertensie nooi voormalige lede uit om aansoek te doen vir heraanstelling in die SAPD sal Sondag, 18 Junie, in die Sunday Times, Rapport en City Press gepubliseer word, het genl.maj. Sally de Beer, nasionale woordvoerder van die polisie, gesê. “Inligting oor die heraanstelling sal ook op die SAPD se webwerf (onder “careers”) gepubliseer word.

“Alle aansoeke sal oorweeg word gebaseer op die beskikbaarheid van vakante poste. Die fokus van die heraanstellingsproses is om kapasiteit in verskeie SAPD-omgewings te verbeter veral wat betref handelsmisdaadeenhede, georganiseerde misdaadeenhede, speurafdelings by polisiestasie, die eenheid vir gesinsgeweld, kinderbeskerming en seksuele oortredings, forensiese maatskaplike werkers, intelligensieversamelaars, misdaadinligtingsbeamptes, polisiestasies, 10111-sentra, honde-eenhede, openbare orde-polisiëring, berede eenhede en algemene ondersteuning.

Die volgende kriteria sal oorweeg word wanneer die aansoeke gekeur word.
Aansoekers moet:
– aangestel wees as ʼn lid van die SAPD kragtens die Wet op die Suid-Afrikaanse Polisiediens, 1995 (Wet no 68 van 1995), en gedien het in die rang van konstabel, sersant of adjudant-offisier;
– suksesvol basiese opleiding afgelê het en betrokke funksionele polisie-opleidingskursusse waar van toepassing vir operasionele poste;
– ʼn goeie dissiplinêre en bywoningsrekord toe die lid voorheen in die SAPD werksaam was;
– in besit wees van ʼn graad 12 (matriek) of hoër kwalifikasie;
– ʼn geldige rybewys besit (kode B);
– ʼn Suid-Afrikaanse burger wees (bewys moet verskaf word);
– minstens twee van die amptelike tale magtig wees, waarvan een Engels moet wees;
– homself of haarself kan onderwerp aan ʼn mediese ondersoek soos bepaal deur die nasionale kommissaris;
– ʼn sielkundige assessering ondergaan soos bepaal deur die nasionale kommissaris om te voldoen aan die profiel van ʼn polisiebeampte;
– nie enige sigbare tatoeëermerke hê wanneer ʼn uniform gedra word nie; tatoeëermerke moet nie onversoenbaar wees met die doelstellings van die SAPD nie;
– geen vorige kriminele skuldigbevindings of hangende kriminele dissiplinêre sake hê nie;
– toestemming verleen dat sy of haar vingerafdrukke afgeneem kan word en dat agtergrondondersoeke gedoen kan word;
– nie onbevoeg verklaar wees om ʼn vuurwapen te besit nie;
– bereid wees om ontplooi te word gebaseer op die behoeftes van die SAPD, wat insluit dat die persoon moontlik verplaas moet word op eie onkoste, of om ʼn pos te aanvaar wat nie naby aan die persoon se huidige blyplek is nie;
– nie betrokke wees by enige onderneming of aktiwiteit wat teenstrydig is met integriteit van die SAPD nie en bereid wees om weer ʼn kursus af te lê of enige ander opleiding soos bepaal deur die nasionale kommissaris.

Voormalige lede wat afgetree het (vervroegde aftrede of wat verpligte aftreeouderdom bereik het), wat eerbaar ontslaan is of afgedank is uit die SAPD, of die SAPD verlaat het hangende ʼn dissiplinêre ondersoek en/of kriminele vervolging, of die SAPD langer as 10 jaar gelede verlaat het of nie minstens nog vyf jaar diens kan aflê voor aftrede nie, sal nie vir heraanstelling oorweeg word nie.

“Die heraanstellingsproses is gemik daarop om voormalige werknemers aan te stel wat in staat is, gewillig is, en toegewyd is om die vaardigheid en dienslewering van die SAPD te verbeter danksy hul ervaring, vaardighede en kennis,” het De Beer bygevoeg. “Die proses sal op gehalte fokus en nie op die hoeveelheid aanstellings nie. Slegs aansoeke wat betyds ontvang is en op die voorgeskrewe vorms ingevul is en aan die voorgeskrewe kriteria voldoen, sal oorweeg word.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

20 Kommentare

jongste oudste gewildste
Johannes van Staden

Wie wil nou teruggaan na so n vrot spul !

Dawie

Jy sal maar uiters desperaat moet wees om terug te gaan soentoe. Het darem nog ‘n bietjie self trots beslis nee dankie!

Wanda

As die huidige polisie aan die vereistes voldoen, dan is die mag amper leeg. Die blankes wat nie meer in die mag is nie, werk by die hordes in die buiteland en kry goeie geld. Al is ons vrouens vir maande alleen tuis. Dit is n vrot spul, stem saam. Stem saam jahannes

zoom zoom

En wat moet die kleur van die vel wees.

Veritas

Hulle het agtergekom dat integriteit belangrik is maar dit bestaan nie in vandag se mag nie. Die ou hande moet net die beeld van die SAPS kom verbeter.