Pakslae tuis nou onwettig

Argieffoto

Die African Christian Democratic Party (ACDP) het gesê dié party sal ʼn appèl steun teen ʼn hofuitspraak vandeesweek waarin beveel is dat “redelike tugtiging” nie meer ʼn aanvaarbare verweer is teen ʼn aanklag van aanranding nie.

Mail and Guardian berig regter Raylene Keightley het Donderdag in die hooggeregshof in Johannesburg bevind “die gemenereg-verdediging van redelike tugtiging is ongrondwetlik en is nie meer van toepassing in ons wetgewing nie”.

Lyfstraf is al voorheen as onwettig verklaar in skole, maar daar is nog nie voorheen ʼn regsuitspraak gelewer oor volwassenes wat binne ʼn gesin kinders ʼn pak slae gee nie. Keightley het egter bevind lyfstraf is nie net onwettig in private huishoudings nie, maar kan ook nie op grond van geloofsoortuiging geregverdig word nie.

Times Live berig die uitspraak is gelewer in ʼn saak teen ʼn Moslem-pa wat sy seun tuis geslaan het omdat hy na bewering na pornografie gekyk het. Die man is skuldig bevind op twee aanklagte van aanranding met die doel om ernstig te beseer. Hy het appèl aangeteken teen die skuldigbevinding en die kwessie van “redelike tugtiging” van ʼn kind by die huis het tydens die appèl onder die vergrootglas gekom.

Die hof het onder meer in sy uitspraak beklemtoon dat die beskerming van kinders veral belangrik is inaggenome die hoë vlak van geweld en mishandeling van kinders in die samelewing.

Cheryllyn Dudley, ACDP-LP, het in reaksie op die uitspraak gesê die party stem nie saam met Keightley se uitspraak nie aangesien dit die rol van die parlement, wat daarvoor verantwoordelik is om wette te maak en te wysig, oorneem.

“Die parlement, wat die verteenwoordigers van die landsburgers is, het hierdie kwessie oor baie jare al deeglik ondersoek en bevind dit sal nie die gewenste uitwerking hê om redelike tugtiging af te skaf nie,” het sy gesê. “Die verdediging van redelike tugtiging het tot nou toe beteken die matige en redelike tugtiging van kinders deur hul ouers op die ouers se diskresie en vir baie is dit ʼn nie-onderhandelbare verantwoordelikheid.”

Sy het gesê hoewel Keightley in haar uitspraak beklemtoon het dat die doel nie is om ouers van ʼn misdaad aan te kla nie, maar eerder om hulle te lei om meer positiewe en effektiewe maniere te vind om hul kinders te dissiplineer, is die ACDP van mening dat die afskaffing van redelike tugtiging negatiewe gevolge sal inhou.

“Die afskaffing van redelike tugtiging sal die gesag van ouers ondermyn en hulle ontmagtig. Dit sal ook die aandag aflei en reeds beperkte hulpbronne verder inkort om die werklike probleem van aanranding en geweld teen kinders in Suid-Afrika te takel,” het Dudley gesê.

Sy het gesê die party glo ouers moet gerespekteer en ondersteun word in hul belangrike taak om hul kinders groot te maak. “Staats- of wetlike inmenging sonder rede in hierdie sake skend ʼn kind se reg tot liefdevolle dissipline en ouers se reg om hul gesinne te lei en keuses binne die konteks van hul oortuigings te doen.”

Sy het gesê die party sal enige appèl in hierdie verband wat in openbare belang gemaak word, ondersteun.

Freedom of Religion SA het gesê hy neem kennis van die hofuitspraak en sal binnekort ʼn mediaverklaring in die verband uitreik.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

265 Kommentare

jongste oudste gewildste
Ander Annie

Dan moet die Staat maar my bloedjie vat en grootmaak en sommer alles betaal ook. Solank hy onder my dak is en ek vir hom sorg, sal hy sy pak slae kry op sy tyd. Behoede hom as hy my gaan aankla. Ek sal self sy tassies pak en him by die naaste polisie stasie gaan slaai. Dit is absoluut belaglik. Pleks dat die Staat plaasmoorde, misdaad en korrupsie aanspreek.

Apie

Niks werk beter as n pak slae nie!!! Ek is met n pak slae groot gemaak, en so my kinders. Ons is welopgevoede mense. Kyk hoe lyk ons jeug van vandag. Hierdie regter moes meer slae gekry het as kind!! Daar is geen plaasvervanger vir matige tugtiging nie.

Gerhard

Geen, maar GEEN!, regering of grondwet sal my keer om my kinders te tugtig volgens die Woord nie; veral nie hierdie kommunistiese & drakoniese regering nie!

Reinhardt Stander

En min mense wil erken dat ons regering se doelwit is om godsdiens, spesifiek die van Christene, te teiken. Godsdiensvryheid word al hoe meer ingeperk.

Fourie

Die parlement en justisie moet diffirensieer tussen redelike tugtiging en mishandeling. En kinders moet dit tuis en op skool sodanig geleer word. Ouers moet ook daarin opgevoed word. ‘n Verantwoordelike volwassene sal nooit aan ‘n kind slaan uit hy/sy eie woede nie. Stuur die kind kamer/badkamer toe en koel eers self af. Gaan praat dan redelik met die kind oor die oortreding en die gevolge daarvan en gee ‘n paar goeie rapse op die boude. Niks daarmee verkeerd nie. Dis is redelike tugtiging. Om ‘n kind uit woede ‘n klap of twee enige plek op die lyf te gee, of… Lees meer »