‘Pos Gordhan oor Eskom’

Pravin Gordhan. Foto: GCIS

Die Nasionale Metaalwerkersunie van Suid-Afrika (Numsa) het Donderdag versoek dat Pravin Gordhan onmiddellik gepos moet word vir sy beweerde rol in koste-oorskryding by die sukkelende Eskom.

Gordhan, minister van openbare ondernemings, het verlede week gesê die twee nuwe multi‑miljard randse Medupi- en Kusile-kragstasies is “swak ontwerp en gebou”. Die twee stasies was veronderstel om 9 600 MW tot die kragnetwerk by te dra en moes in 2015 al ten volle in bedryf gewees het.

Die kragstasies is egter nog ver van voltooid en gaan nou uiteindelik meer as R292 miljard kos, nagenoeg dubbel die aanvanklike prys.

Numsa het gesê Gordhan is deel van die leierskap wat sê dat hulle hard stoei om die krisis by Eskom te los maar dat hy en die res van die leierskap vir die plundering van Suid-Afrika se staatsbeheerde maatskappye verantwoordelik is.

“Numsa verwerp Gordhan se bewering dat Enel [Italië se grootste kragverskaffer] die beurtkragkrisis sal oplos wanneer ons weet dat Enel ’n begunstigde van die IPP-projek is,” het Numsa gesê. Die vakbond het al voorheen kritiek gelewer op die program vir onafhanklike kragprodusente (IPP).

Enel is deur die regering aangestel om eksterne tegniese bystand aan Eskom te lewer en sal van hul topingenieurs stuur om ʼn bedryfsoudit van al Eskom se kragstasies te doen ten einde die grootste probleme vas te stel.

Volgens Numsa is die krisis by Eskom egter eie toedoen wat deur IPP’s, verhoogde steenkoolpryse, ʼn te groot top- uitvoerende struktuur, tenderkorrupsie en koste-oorskryding by Medupi en Kusile veroorsaak is.

Numsa staan die ontbondeling van Eskom teen aangesien dit volgens die vakbond geen oplossing bied vir die krisis nie.

“Die gevolge van ontbondeling is baie meer nadelig as wat verwag word. Die gevolge sluit in afleggings, die sluiting van besighede, spookdorpe veral in Mpumalanga en tariefverhogings veel hoër as wat bekostigbaar is vir mense wat minimumloon kry.”

Volgens Numsa kan die staatsbeheerde instelling nie vir private individue gegee word om geld te maak uit ʼn nasionale sleutelbate nie. “As ʼn land kort ons ʼn volhoubare en bekostigbare elektrisiteitstarief ten einde produksie en industrialisering te bevorder en bowenal om elektrisiteit aan ons gemeenskappe te verskaf.”

Tito Mboweni, minister van finansies, het gister tydens sy begrotingsrede aangekondig dat Eskom R23 miljard per jaar oor die volgende tien sal kry.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

27 Kommentare

jongste oudste gewildste
Pieter

Ek weet nie eers hoeveel nulle in ‘n miljard is nie. Deesdae is ons geld ook maar min werd….

Afrikaner

Numsa, vir julle gaan dit nie om die ekonomie reg te kry nie, julle kyk nie oor die langtermyn nie, maar die korttermyn, julle wil net poste skep sodat meer mense indiens geneem kam word, dat julle meer lede kan kry, ens ens ens.

Irma

Ag asseblief numsa. Die anc neem die besluite. Nie Gordhan nie. Hy is slegs die pion wat die gesig vorm. Moontlik is ek verkeerd maar dis hoe hulle ‘track record’ lyk.

Gert van Wierdapark

Numsa sit al weer die pot mis! Nutttelose Manne Sal Aankarring (numsa) tot geen lid van hom meer ‘n joppie nie. Numsa lyk na deel van die krisis. Miskien moet hy ook ontbondel word!

BlinkStephaans

Gordan het maar noudiedag die staatsbeheeede ondernemings oorgeneem… hy het maar ñ pot bol geërf as jy my vra… kom ons kyk maar wat hy kan uitrug. Ek sal net graag wil hê iemand moet op ñ dag begin name noem vir die ou verskoning van swak ontwerp… wie het dit ontwerp… wie het dit goedgekeur… ens ens…. want dit bly die veeskoning. Kan ons nie maar daar ook begin uitsorteer?