Rower tydens jaagtog doodgeskiet

Polisiebeamptes het die verdagtes se voertuig agternagesit totdat dit teen ’n elektriese paal vasgejaag het (Foto: Verskaf)

’n Rower is Maandag doodgeskiet tydens ’n hoëspoedjaagtog met die polisie en sekerheidsbeamptes in die Johannesburgse middestad.

Dié rower en sy twee makkers word al vir ’n geruime tyd gesoek vir verskeie gewapende rooftogte en motorkapings in die Johannesburg-omgewing.

Volgens lt.kol. Mavela Masondo, polisiewoordvoerder, het lede van die polisie se misdaadintelligensie-eenheid, Gautengse hoofwegpatrollie-eenheid, Gautengse verkeersversadigingseenheid, Tracker Connect, BadBoyz Security en Vision Tactical inligting van dié drie opgevolg.

Dié multidissiplinêre span het volgens die inligting die verdagtes se voertuig – ’n Audi A5 – omstreeks 14:00 in Mayfair opgespoor. Die drie verdagtes was in die motor.

“Die span het die verdagtes probeer voorkeer, maar hulle het weggejaag. Die beamptes het hulle agternagesit en ’n skietery het tussen hulle en die verdagtes uitgebreek.”

Twee van die verdagtes het tydens die jaagtog uit die motor gespring en te voet gevlug.

“Polisiebeamptes het die verdagtes se voertuig steeds agternagesit totdat dit teen ’n elektriese paal vasgejaag het. Een verdagte wat reeds skietwonde opgedoen het, is binne die voertuig gevind. Paramedici het hom later op die toneel dood verklaar.”

Voorlopige ondersoeke toon dat die voertuig oor ’n vervalste nommerplaat beskik en dat dit na bewering in Mei verlede jaar in Kempton Park gekaap is.

’n Ongelisensieerde vuurwapen en ammunisie is in die verdagtes se motor gevind.

’n Soektog vir die oorblywende verdagtes duur voort.