(Foto: Hugo Vaughan/WSAR)
’n Stapper is vandeesweek uit ’n smal sloot op Tafelberg gehys en vir hospitaalbehandeling geneem nadat sy 15 meter ver by ʼn waterval geval het. Die stapper is die tiende persoon om van die smal kontoerpaadjie by dié waterval te tuimel.
Die 64-jarige stapper het Woensdagoggend ʼn smal gedeelte van die kontoerpaadjie tussen die Platteklipkloof- en Indië Venster-staproete oorgesteek toe sy gegly en by die waterval geval het.
Die vrou het saam met familielede gestap toe die ongeluk plaasgevind het en hulle kon hulp ontbied.
Reddingswerkers van Wildernis-soek-en-redding (WSAR) het op die noodoproep gereageer en tot by die beseerde stapper gestap. Sy is op die toneel ondersoek en gestabiliseer voordat sy op ’n draagbaar getel is.
(Foto: Hugo Vaughan/WSAR)
’n Helikopter is ook na die toneel ontbied.
ʼn Tegniese toustelsel is gebruik om die stapper versigtig uit die smal sloot te kry waarin sy geval het voordat sy tot in ’n helikopter gehys is.
Die vrou is vandaar na ʼn nabygeleë landingsone vervoer voordat sy per ambulans na ʼn hospitaal geneem is.
David Nel, ’n woordvoerder van WSAR, sê die punt bokant die waterval op die kontoerpaadjie het ’n nare reputasie ontwikkel. “Ons het al ʼn aantal ernstige voorvalle gesien, almal op een plek onder die waterval.
“Van die tien aangetekende voorvalle is twee mense ernstig beseer en vyf kritiek beseer nadat hulle van dieselfde plek geval het.”
Drie het gesterf.
WSAR doen nou ʼn beroep op stappers om uiters versigtig te wees wanneer hulle hierdie gedeelte van die kontoerpaadjie oorsteek.
(Foto: Hugo Vaughan/WSAR)
Is daar enige kennisgewings rondom die gevaar by die waterval? Cape nature kan mos sake in die gesig staar indien dit nie uitgewys word nie, of hoe ek dit nou?
Common sense het mos nie kennisgewingsborde nodig nie. Of hoe?
Daar kan mos maar net ń tou of kabel aangebring word vir daardie meter of drie waaraan voetslaners kan vashou en ń kennisgewing daarby behoort voldoende te wees
Kan hulle nie maar net ‘n handreling daar sit vir daai stukkie nie. Daar is oral op ander plekke relings of kettings etc. om mense te help.
Ek ken nie die staproete nie, maar….Kan hulle nie ‘n soort heining daar oprig vir veiligheid en vashouplek nie?
Ai ek hoop sy herstel vinnig en hulle kan n manier kry om daai deel veiliger te maak.