Verdagtes met beskermde spesies in Kanoneiland betrap

Van die plante wat gevind is (Foto: SAPD Noord-Kaap)

Waaksame beamptes van die Kanoneiland-polisie in die Noord-Kaap was Maandagoggend besig met misdaadvoorkomingspatrollies toe hulle ŉ verdagte wit Nissan-vragmotor op die N14 opgemerk het. Die vragmotor het verskeie sakke vervoer en die beamptes was agterdogtig.

“Hulle het die vragmotor voorgekeer en ŉ roetine-inspeksie gedoen. Verskeie inheemse plante is in die sakke opgespoor,” sê sers. Omphile Masegela, woordvoerder van die polisie. “Die bestuurder van die vragmotor kon nie ŉ geldige permit of toestemming oorhandig om die plante te besit of te vervoer nie.”

ŉ Voorlopige ondersoek deur die eenheid teen veediefstal en bedreigde spesies, het onthul dat die plante na raming sowat R180 000 werd is.

“Die drie mans wat in die vragmotor gery het, is in hegtenis geneem op aanklag van die onwettige besit van beskermde plante.”

Een van die mans is boonop ŉ gesoekte verdagte in ŉ ander saak.

Die drie mans, onderskeidelik 27, 35 en 37 jaar oud, sal binnekort in die hof verskyn.

Lt.genl. Koliswa Otola, provinsiale polisiekommissaris, het die beamptes, sers. Ephraim Olyn en konst. Michelle Kasper, geloof vir hul waaksaamheid en goeie werk.