Die polisie in Keimoes ondersoek ʼn saak van strafbare manslag nadat ʼn trompop botsing op die N14 naby Keimoes Saterdag die lewe van vyf mans geëis het.
Volgens lt.kol. Sergio Kock, woordvoerder van die polisie, het die botsing waarin ʼn Volkswagen Tiguan en ʼn Volkswagen Polo betrokke was, omstreeks 17:45 plaasgevind.
“Vier Suid-Koreaanse mans wat van Kakamas na Upington onderweg was, is in die Volkswagen Tiguan aangetref. Een insittende is op die toneel dood verklaar. Die ander drie mans is na ʼn nabygeleë hospitaal vir mediese behandeling geneem.
“Al vier mans wat in die Volkswagen Polo was – almal inwoners van Kakamas – is op die toneel dood verklaar,” sê Kock.
Polisieondersoeke duur voort.