Amerikaanse owerhede op soek na dié SA man

Barrett Preston Busschau. Dié foto is in 1993 geneem. Foto: FBI

Die FBI in die VSA het ʼn reusebeloning uitgeloof vir inligting wat kan lei tot die inhegtenisneming van ʼn Suid-Afrikaanse man wat in Oregon in verband met verskeie seksaanklagte gesoek word.

Barrett Preston Busschau is op 27 Julie 1993 in die Clackamas-distrik in hegtenis geneem vir die beweerde molestering van vyf meisies, tussen vyf en 15 jaar oud. Busschau was toe vermoedelik 18 jaar oud.

Volgens inligting wat deur die FBI uitgereik is, staan Busschau tereg op ʼn reeks aanklagte wat seksuele aanranding, verkragting en sodomie insluit. Busschau is op borgtog vrygelaat hangende die verhoor teen hom, maar het op die vlug geslaan en nie op 4 Oktober 1993 in die hof verskyn soos hy moes nie. ʼn Lasbrief vir sy inhegtenisneming is kort daarna uitgereik.

Volgens die FBI is Busschau in Johannesburg gebore, maar het hy in 1984 na die VSA gereis en is hy in 1989 permanente verblyfstatus toegeken. Die owerhede glo Busschau kon moontlik in die tyd sedert hy op die vlug geslaan het na Kalifornië of Panama gereis het, maar vermoed hy woon tans in Suid-Afrika.

Busschau gebruik ook die name Barrett Preston Bussachau, Barrett Preston Busschall en Barrett Busschall. Hy het bruin hare, blou oë en is tussen 1,6 en 1,8 m lank. Volgens die FBI het hy ʼn tatoeëermerk van ʼn groen en pers yin-yang-simbool met twee kolletjies langsaan op sy regterenkel.

Die FBI bied ʼn beloning van $10 000 (ongeveer R122 000) aan vir inligting wat direk tot Busschau se inhegtenisneming kan lei. Enigiemand met meer inligting oor waar Busschau homself bevind, word versoek om die FBI direk of die naaste Amerikaanse ambassade of konsulaat te kontak.

ʼn Kunstenaarsvoorstelling van hoe Barrett Preston Busschau moontlik nou lyk. Skets: FBI

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

8 Kommentare

jongste oudste gewildste
Tess

Agv ons ekonomiese situasie en die rand/dollar kan hierdie man homself as voelvry sien

Trots Afrikaans

Barrett, as jy weet waar jy is, bel my, ons kan die geld deel. Ek sal jou 20% persent “finders fee” gee.

Veritas

Na 25 jaar soek hulle hom nou. Dit sê nie veel van die VSA regstelsel nie.

Marinda

Ek moet lag vir van die kommentaar. Dankie mense, julle maak my dag.

CASSIE

Ek weet nie eintlik wat om te dink van die VSA se regstelsel nie.Hoeveel mense is al ter dood veroordeel en na jare in die tronk word hulle op appel onskuldig bevind.Mense word na hulle lewenslange vonisse gekry het na jare vrygelaat na hulle op appel onskuldig bevind is Ek dink nog aan 9/11,waar was die intellegensie.Ek wonder maar net