Dít is silwerdoek se duurste juwele

Heart of The Ocean. (Foto: DL Magazine)

ʼn Onlangse ondersoek het probeer vasstel wat die duurste juweliersware is wat deur karakters op die silwerdoek en op televisie gedra is. Van die duurste juweliersware, sou dit ooit verseker moes word, se waardasie beloop miljarde rand.

Die huisversekeringkundiges by Confused.com het bevind dat die bekende “Heart of the Ocean”-halssnoer wat deur Rose in die rolprent Titanic gedra is, gelykstaande is aan die duurste juweliersitem wat tot op hede in ʼn rolprent gedra is.

Die blou diamantstuk wat deur Kate Winslet se karakter gedra is, word deur Queensmith Master Jewellers in Engeland gewaardeer op meer as R8 miljard.

Dié onvergeetlike snoer wat ikonies is vanweë sy 56-karaat hartvormige diamant, is deur die Hope-diamant van meer as 45 karaat geïnspireer. Die Hope-diamant is in die 17de eeu in Indië ontdek en word tot op hede beskou as een van die wêreld se waardevolste diamante.

Die tweede duurste halssnoer is deur Anne Hathaway as Daphne Kluger in Ocean’s 8 gedra en is na raming byna R2,5 miljard werd. Die bekende “Toussaint”-halssnoer bestaan uit verskillende groottes diamante, insluitend die 136,25 karaat blou-wit “Koningin van Holland”-diamant en ʼn 12 karaat olyfgroen diamant. Dié halssnoer, soos wat dit in die rolprent gewys word, het destyds nog bestaan, maar is intussen al uitmekaar gehaal om ander juweliersware te maak.

Hier is van die waardevolste diamanthalssnoere wat al in rolprente gesien is:

Terwyl daar talle uitspattige pragstukke in rolprente gedra is, het navorsers bevind dat die duurste juweliersware wat in televisiereekse gedra word, dikwels verloofringe is.

As een van die herkenbaarste juweliersitems in die wêreld se geskiedenis, is dit nie verbasend dat ʼn namaaksel van prinses Diana se verloofring ʼn verskyning in die bekende televisiereeks The Crown, wat die lewe van die Britse koninklikes uitbeeld, maak nie.

Dié 12 karaat blou saffierring wat met 14 diamante omring is, se geskatte waarde is meer as R8,05 miljoen.

Die karakter Blair Waldorf spog in Gossip Girl met ʼn 8 karaat Harry Winston-verloofring, ook ter waarde van R8,05 miljoen.

Hier is van die waardevolste juweliersware wat al in televisiereekse gesien is: