ʼn Studente-bofbalspeler in die VSA is Saterdag tydens ʼn wedstryd in Texas deur ʼn dwaalkoeël getref.
CBS News berig die 18-jarige student aan die Texas A&M University-Texarkana, wie se naam nie bekend gemaak is nie, het ʼn operasie vir sy beserings ondergaan. Volgens die universiteit is die student tans in ʼn bestendige toestand.
Luidens ʼn verklaring deur die Texarkana-polisie het die koeël vermoedelik van ʼn skietery gekom wat in ʼn woonbuurt naby die bofbalveld plaasgevind het.
Die bofbalspeler was omstreeks 17:30 in die omgewing van die gooiers se opwarmingsgebied op die universiteit se George Dobson-veld in Spring Lake Park toe hy deur die koeël getref is. Hy is ná die voorval na die St. Michael-hospitaal gehaas.
Die wedstryd tussen Texas A&M-Texarkana en die Universiteit van Houston-Victoria is kort ná die voorval gestaak. Beradingsdienste is aan al die ander spelers en teenwoordige studente beskikbaar gestel.
Meer besonderhede oor die skietery was nog nie Maandag beskikbaar nie.