Van prins Harry tot Britney Spears: bekendes het nie vanjaar geskroom om beheer oor hul eie lewensverhale te neem nie.
Maroela Media bied vir jou ʼn opsomming van die bekendes wat in 2023 memoires en dokumentêre reekse oor hul lewens uitgereik het.
Britney Spears
Die popsangeres Britney Spears het in Oktober vanjaar haar langverwagte memoires, The Woman in Me, uitgereik. In dié boek onthul die 41-jarige besonderhede oor die beginjare van haar loopbaan, haar stormagtige verhouding met die sanger, Justin Timberlake, en haar 13 jaar lange voogdyskap.
Prins Harry en Meghan Markle
Die Sussex-egpaar het dié jaar die deure na hul binnekamer en familiesake opnuut vir die publiek oopgegooi.
Hul opspraakwekkende Netflix-dokumentêr, Harry & Meghan, is in Desember 2022 uitgereik, met Harry se onthullende memoires, Spare, wat in Januarie gevolg het. Hy het kort daarna ook ʼn onderhoud aan Anderson Cooper toegestaan wat later in CBS se 60 Minutes-program verskyn het.
Harry brei in Spare uit oor sy verhoudings met verskeie lede van die Britse koningshuis, sy grootwordjare en die verlies van sy ma op 12-jarige ouderdom. Hy onthul ook besonderhede oor opspraakwekkende gebeurtenisse in sy lewe, en wy ook ʼn groot deel van die boek aan sy vrou, Meghan Markle.
Daar is meer as 3,2 miljoen kopieë van die boek in die eerste week ná uitreiking verkoop.
Barbra Streisand
Hollywood-aktrise en sangeres, Barbra Streisand, het baie te sê oor haar 81 jaar lange lewe. So baie, dat sy maklik ʼn 970-bladsy-memoires kon neerpen.
Dié memoires, My Name Is Barbra, is ʼn openhartige vertelling van Barbra se kinderdae, tye as jong volwassene in ʼn glansryke Hollywood, en interessante loopbaan wat oor dekades strek.
Sy verklap in dié boek onder meer wie haar gunstelingkêrels was, wie haar verras het en wie sy nooit weer voor haar oë wil sien nie. Sy gee lesers ook ʼn blik in haar binnewêreld, en skryf selfs oor haar liefde vir kos maar haat vir kosmaak.
Pamela Anderson
Pamela Anderson, Baywatch-aktrise en model, het vanjaar nie net ʼn boek uitgereik nie, maar daar was ook ʼn onthullende dokumentêre rolprent op Netflix te sien.
Die rolprent, Pamela: A Love Story, en die boek, Love, Pamela, is in Januarie uitgereik en vertel die storie van dié model se lewe, verhoudings en ervarings. Dit vertel ook die storie oor hoe sy aanvanklik bekend geword het, hoe haar loopbaan gegroei het en hoe dit haar uiteindelik geraak het.
Paris Hilton
Paris Hilton (42) het in Maart vanjaar haar memoires, Paris: The Memoir, uitgereik. Hierin vertel sy veral hoe sy as tiener “ontvoer” is en na ʼn verbeteringskamp gestuur is. Dié kamp het na bewering sy gaste aan vreeslike mishandeling onderwerp, iets waaroor Paris deur haar volwasse lewe heen bewustheid probeer skep het.
Dié glanspersoonlikheid is in 2021 met Carter Reum getroud en het sedertdien die ma van twee spruite, Phoenix en London, geword.
Jada Pinkett Smith
Die tonge het omtrent geklap toe Jada Pinkett Smith haar memoires, Worthy, in Oktober vanjaar uitgereik het.
In dié boek onthul sy dat sy en Will Smith, haar man van 26 jaar, reeds sewe jaar lank van bed en tafel geskei is. Alhoewel hulle nog wettiglik getroud is, leef hulle al sedert 2016 onafhanklike lewens.
Sy skryf ook in die boek oor haar verhouding met die kletsrymer, Tupac Shakur, asook haar stormagtige kinderlewe in Baltimore, VSA.
David en Victoria Beckham
Die sokkerster, David Beckham, en sy vrou, Victoria, het die wêreld verras met ʼn dokumentêre reeks oor hul liefde, lewens en loopbane.
In die vier-episode-reeks wat in Oktober vanjaar op die Netflix-stromingsplatform verskyn het, word die storie vertel van hoe dié twee Britse bekendes ontmoet en verlief geraak het.
Ander memoires
Ander bekendes wat hierdie jaar boeke oor hul lewens uitgereik het, sluit onder meer John Stamos, Kerry Washington, Elliot Page, Patrick Stewart, Laura Dern, Diane Ladd, Willie Nelson en wyle Anne Heche in.