Hospitaal se krane aan toilette gekoppel

Die Osaka University Hospital (Foto: Ourlad Tantengco. Twitter)

Hospitaalpersoneel en pasiënte van ʼn hospitaal in Japan het vir die afgelope 30 jaar sonder hul medewete toiletwater gedrink en dit gebruik om hande te was.

Dit het verlede maand aan die lig gekom dat drinkwaterpype van die Osaka-universiteitshospitaal in Suita, Japan, verkeerdelik aan die toilet gekoppel is. Die hospitaal is deel van die Osaka Universiteit se mediese fakulteit.

Daily Mail berig dié skokkende fout is ontdek toe die hospitaalbestuur verlede maand die gebou geïnspekteer het, voordat hulle met die bou van ’n nuwe watersuiweringsaanleg sou begin.

Met verdere ondersoek is bevind dat ongeveer 120 krane verkeerdelik aan die toilet gekoppel is. Daar is ook bevind dat dié probleem al 30 jaar gelede ontstaan het – net ná die hospitaal in 1993 geopen is.

Hindustan Times berig die universiteit ondersoek die saak en het die watergehalte nagegaan. Geen gesondheidsgevaar is bevestig nie.

Luidens verslae het die hospitaal die kleur, reuk en smaak van water ten minste een keer per week nagegaan en geen probleme is sedert 2014 aangemeld nie.

Osaka Universiteit en die hospitaal se vise-president, Kazuhiko Nakatani, het tydens ʼn mediakonferensie om verskoning gevra vir die fout. Hulle het die publiek verseker dat hulle voortaan gereeld die aansluiting van hul waterpype sal nagaan.