Skade wat aan die dorp Amory in Mississippi aangerig is, nadat ‘n tornado dit getref het. (Foto: Facebook/ Matt Laubhan)
ʼn Meteoroloog van ʼn plaaslike nuuskanaal in die Amerikaanse deelstaat Mississippi het sigbaar emosioneel geraak en hardop tot Jesus begin bid toe hy inligting oor ʼn naderende tornado tydens ʼn regstreekse uitsending ontvang het.
“Liewe Jesus, help asseblief daardie mense. Amen,” het Matt Laubhan gebid voordat hy voortgegaan het om die spesifikasies van ʼn tornado te deel wat op pad was na die dorp Amory.
Minstens 23 mense is Vrydag oor die hele Mississippi dood toe ʼn tornado verskeie dorpe in dié deelstaat getref het. Geen sterftes is egter in Amory aangeteken nie, ondanks grootskaalse verwoesting wat hier gesaai is. Die storm het laat Vrydag getref en huise, bome en ondernemings in verskeie dorpe platgevee, berig The New York Times.
Laubhan, hoofmeteoroloog vir die plaaslike nuuskanaal WTVA, het kykers ingelig oor wat om van ʼn lewensgevaarlike tornado te verwag wat in die rigting van Amory beweeg het.
“As ons kyk na 65 km/h behoort die tornado ʼn paar strate aan die westekant van Amory oor minder as twee minute te tref. Dit is ʼn lewensbedreigende tornado wat óf bitter naby aan die dorp verby gaan beweeg, óf deur die noordelike deel daarvan gaan inbeweeg,” sê hy op kamera.
“Die werklikheid is egter dat hierdie ding van rigting kan verander. So, Amory, julle moet in jul tornado-skuilplekke wees.”
Sy woorde is skaars koud of hy kry skynbaar nuwe inligting wat bevestig dat die tornado gedraai het en inderdaad die dorp gaan tref. Dit is dan wanneer hy begin bid.
????#WATCH: As a meteorologist Live on air from WTVA overwhelmed as a major tornado hits Amory, Mississippi
????#Amory | #Mississippi
⁰Heartbreaking video shows meteorologist Live on tv on WTVA overwhelmed as a major tornado hits the town of Amory after pic.twitter.com/ucaLXxSG8T…— R A W S A L E R T S (@rawsalerts) March 25, 2023
Reddingswerkers oor die hele Mississippi het Saterdagoggend begin om mense uit die puin te red. Volgens BBC is meer mense waarskynlik onder die puin van ineengestorte sakeondernemings vasgekeer. Die dorp Rolling Fork in Sharkey County is skynbaar die ergste getref en volgens inligting is dit feitlik platgevee.
Kenners sê die tornado was besonder sterk en het puin meer as 9 km ver geslinger.
Kyk ‘n video van die verwoesting in Amory hier:
