Argieffoto
Susanto, hoof van die soek- en reddingseenheid in Jayapura, die hoofstad van die Papua-provinsie, het bevestig dat die wrak gevind is. Soldate, polisiebeamptes en reddingswerkers is op pad na die toneel waar die vliegtuig naby Oksibil neergestort het.
“Sowat 60 personeellede van die soek-en-reddingseenheid, die weermag en die polisie is op pad na die toneel, maar ons weet nog nie presies waar hulle is nie aangesien daar geen sein vir kommunikasie is nie,” het J.A.A Barata, woordvoerder van die vervoerdepartement, gesê. Hy het gesê die reddingsoperasie word bemoeilik deur gure weer en die bergagtige gebied waar die vliegtuig neergestort het.
Die vliegtuig van Trigana Air Service was op pad van Jayapura na Oksibil en kontak is enkele minute voordat die vliegtuig moes land, verloor. Daar was 49 passasiers, onder wie vyf kinders, en vyf bemanningslede aan boord van die ATR42-300-vliegtuig. Die vlug was veronderstel om sowat 42 minute te duur.
Groot gedeeltes van die Papua-provinsie is bedek met ondeurdringbare oerwoude en berge. Sommige vliegtuie wat voorheen daar neergestort het, is nooit gevind nie.
