Soorte resepte:

Maklike hoenderpastei

6 porsies

Bestanddele:
15 ml (1 e) olyfolie
8 hoenderporsies of een heel hoender
250 ml (1 k) hoenderaftreksel
1 lourierblaar
3 elk heel kruienaeltjies en wonderpeper korrels
Sout en varsgemaalde swartpeper na smaak
2 uie, gekap
2 knoffelhuisies, gekneus
250 g sampioene, in skyfies gesny
15 ml (1 e) gedroogde gemengde kruie
125 ml (½ k) kookvloeistof van hoender

Kors:
125 ml (½ k) melk
1 eier
125 ml (½ k) olie
250 ml (1 k) koekmeel
ʼn knippie sout
10 ml (2 t) bakpoeier

1. Verhit ʼn bietjie van die olie in ʼn groot kastrol en verbruin die porsie of heel hoender.
2. Verlaag die hitte en voeg die aftreksel, lourierblaar, speserye en sout en peper na smaak by. Prut die hoender 45-60 minute of tot gaar.
3. Skep die hoender uit en behou die vloeistof waarin die hoender gekook het. Verwyder enige vel en bene en sny die vleis in stukkies.
4. Soteer die uie in die orige olie in dieselfde kastrol. Roer die knoffel, sampioene en kruie by en soteer dit ʼn paar minute.
5. Roer die hoender en genoeg van die behoue vloeistof by die groentemengsel om ʼn redelike klam mengsel te kry. Geur na smaak en skep dit in ʼn oondbak.
6. Voorverhit die oond tot 180 °C.
7. Kors: klits die melk, eier en olie saam. Sif die droë bestanddele saam en voeg dit by die melkmengsel om ʼn slap beslag te vorm. Voeg nog melk by indien nodig.
8. Giet die beslag oor die vleis en bak dit ongeveer 30-40 minute of tot goudbruin en gaar.

Oorspronklik gepubliseer in Spogresepte
Uitgewer: Lapa
Prys: R225,00*
* Prys onderhewig aan verandering

Net soos ʼn pannekoek met die beste resep nog steeds kan flop, kan Maroela nie pa (of ma!) staan vir enige van die resepte wat jy self by die huis probeer nie. Elke koppie meel, bakpoeier, melk, eier of enige ander bestanddeel is dus in jou eie hande en Maroela Media kan nie enige verantwoordelikheid aanvaar vir komplimente (of klagtes) oor jou kookvernuf nie. -Red

Deel van: Gebak, Vleis en seekos

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.