Soorte resepte:

[Resep] Skaapboud

Foto: Corli se kombuis

Heerlike skaapboud. Foto: Corli se kombuis

Daar is min dinge wat so lekker ruik soos skaapboud!

Lewer 6 – 8 porsies

Bestanddele:

  • ʼn Skaapboud van ±2 kg
  • 1,5 kg aartappels, geskil
  • 6-9 knoffelhuisies, 3 geskil en gekneus en die res heel
  • 1 klein bossie roosmaryn, die helfte van die blare verwyder en grof gekap, die ander helfte in takkies
  • fyngerasperde skil van 1 suurlemoen
  • 30 ml olyfolie
  • 15 ml Worcestersous
  • 30 ml seesoutvlokkies
  • 15 ml varsgemaalde swartpeper

Kruisementsous

  • 60 ml gekapte kruisementblare
  • 5 ml suiker
  • 2 knippies sout
  • 15 ml warm water
  • 45 ml wynasyn

Metode:

  1. Voorverhit die oond tot 200 °C en kry ʼn oondbak of -pan gereed.
  2. Sny die aartappels in helftes of kwarte en laat prut in ʼn groot kastrol vir ongeveer 8 minute. Giet die water af en hou eenkant.
  3. Meng die knoffel, gekapte roosmaryn, suurlemoenskil, olyfolie en Worcestersous saam vir ʼn marinadesmeer.
  4. Smeer die skaapboud met sout en peper en vryf die marinadesmeer in. Plaas dit in die oondbak of -pan.
  5. Plaas die aartappels by die vleis in die oondbak, voeg die roosmaryntakkies en heel knoffelhuisies by, geur met sout en peper en bedruip met ʼn goeie skeut olyfolie.
  6. Bak vir ongeveer 1 ¼ uur as jy wil hê die vleis moet nog pienk wees, of 1 ½ uur as jy dit gaarder wil hê.
  7. Haal uit die oond, bedek met tinfoelie en laat rus vir 15 minute voordat jy die skaapboud voorsit.

Kruisementsous

  1. Klits al die bestanddele saam met ʼn staafmenger of in ʼn voedselverwerker tot glad. Sit dit saam met die skaapboud voor.

Bron: Corli se Kombuis
Uitgewer: Human & Rousseau

Net soos ʼn pannekoek met die beste resep nog steeds kan flop, kan Maroela nie pa (of ma!) staan vir enige van die resepte wat jy self by die huis probeer nie. Elke koppie meel, bakpoeier, melk, eier of enige ander bestanddeel is dus in jou eie hande en Maroela Media kan nie enige verantwoordelikheid aanvaar vir komplimente (of klagtes) oor jou kookvernuf nie. -Red

Deel van: Vleis en seekos

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

3 Kommentare

Elizabeth ·

Dit lyk lekker, dankie. Hoekom kan ek die resep nie print nie?

Suné van Heerden ·

Dagsê Elizabeth

Ons moes ongelukkig die funksie wat mens toelaat om teks op die webwerf te kopieer of dat iemand kan regsklik en dan die dokument te kan uitdruk, deaktiveer, aangesien sommige webwerwe ons inligting onregmatig gebruik het.

Jy is welkom om ‘n skermskoot van die resep te maak en dit só in die kombuis te gebruik.

Uiteraard wil ons egter graag hê jy moet die uitgewers ondersteun wat hulle resepte so mildelik gratis aan ons lesers verskaf. Die resepte wat ons publiseer is inderwaarheid ‘n bemarking vir dié wonderlike boeke.

Groetnis
Suné
nms Maroela Media

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.