Die stof het nou al ʼn bietjie gaan lê nadat die nuus gebreek het dat Lewis Hamilton oor ʼn jaar in Carlos Sainz se plek agter die stuur van ʼn Ferrari gaan inskuif.
Maar in plaas daarvan om in sak en as te sit en sy lot te betreur, is die 29-jarige Sainz gerat om vir oulaas sy beste in rooi te gee.
Die Spanjaard het in ʼn onderhoud met Sky Italia gesê dat die besluit hom nie noodwendig onkant betrap het nie – ʼn F1-renjaer moet immers gereed vir enige moontlikheid wees.
“Ek wil nou nie aan enigiets anders dink as om my heel beste vir Ferrari te gee nie,” het Sainz beloof terwyl hy ook erken dat dit nie die beste nuus in aanloop tot die seisoen is nie.
“Wanneer ek my helm in Bahrein opsit, gaan ek myself tot die uiterste druk met die doel om die kampioenskap te probeer wen.”
Die Spanjaard was verlede jaar een van die min renjaers wat vir Max Verstappen kon wen en die geruite vlag is vir hom in Singapoer geswaai.
“Ek is bewus van my waarde as ’n renjaer en ek is kalm wanneer ek na die toekoms kyk. Goeie dinge sal beslis oor my pad kom, maar vir eers wil ek op alle suiers vir Ferrari vuur.”
Die F1-aksie begin amptelik weer op 2 Maart in Bahrein.
F1-kalender vir 2024:
2 Maart: Bahrein
9 Maart: Saoedi-Arabië
24 Maart: Australië
7 April: Japan
21 April: China
5 Mei: Miami
19 Mei: Emilia Romagna (Imola)
26 Mei: Monaco
9 Junie: Kanada
23 Junie: Spanje
30 Junie: Oostenryk
7 Julie: Verenigde Koninkryk
21 Julie: Hongarye
28 Julie: België
25 Augustus: Zandvoort
1 September: Italië
15 September: Azerbeidjan
22 September: Singapoer
20 Oktober: VSA
27 Oktober: Mexiko
3 November: Brasilië
23 November: Las Vegas
1 Desember: Katar
8 Desember: Abu Dhabi.