Norma Plummer en haar afrigtersgroep. (Foto: Twitter/Netball SA)
Ondanks sterspeler Grace Nweke se kniebesering is die Silwer Varings een van die gunstelingspanne om met die Wêreldbeker-louere in Kaapstad weg te stap.
Die 21-jarige Nweke is ʼn wafferse masjien in die doelsirkel en sy was in die kol met 97% van haar doelpogings vóór haar ontydige besering.
Volgens Ameliaranne Ekenasio was die span platgeslaan toe hulle die nuus hoor, maar hulle is oorgehaal om hul beste op die baan te lewer.
“Daar was baie emosie en trane; tog weet ons hoe belangrik dit is om saam te staan. Dinge gebeur in ʼn spanopset wat jou óf uitmekaar kan trek óf die band tussen die spelers versterk,” het die Kiwi-kaptein gesê.
Noeline Taurua, afrigter, stem saam met haar kaptein se saamstaan-stelling.
“Ons het nog altyd geweet dat ons nie net op die vaardighede van een persoon kan steun nie. Ons moet seker maak dat ons spelers het wat verskeie rolle op die baan kan vertolk,” het die 55-jarige afrigter gesê.
Absolutely devastating news to share that shooter Grace Nweke has been ruled out of the Netball World Cup after scans today confirmed a partial tear in her patella tendon. Travelling reserve Tiana Metuarau has been called into the playing 12 for the remainder of the tournament. pic.twitter.com/Ib6INJaND6
— Silver Ferns (@SilverFernsNZ) July 31, 2023
Die Nieu-Seelanders speel vanaand teen Suid-Afrika in ʼn Groep G-wedstryd en Taurua het erken dat sy versigtig vir Norma Plummer is.
Die uitgeslape Aussie het vroeër haar 100ste internasionale wedstryd saam met die Proteas gewen en sy beskik ongetwyfeld oor die vermoë om ʼn haas uit die hoed te pluk; selfs teen ʼn gedugte Nieu-Seelandse span.
“Ek is maar skrikkerig vir haar,” het Taurua met ʼn glimlag gesê.
“Norma is ongelooflik. Sy is een van die bestes nóg, ʼn legende en ek het baie respek vir haar.”
Die Nieu-Seelanders het in Januarie in ’n vierhoekige netbalreeks in Suid-Afrika gespeel en hulle weet dat die tuisspan se ondersteuners met ’n bykomende speler op die baan vergelyk kan word.
“As daar een ding is wat ons in die vierhoekige reeks geleer het, is dit dat ons nie net teen spelers op die baan speel nie, maar ook teen die toeskouers in die pawiljoen. Dit gaan lekker raserig op die baan wees.”
???????? ???????????? ???????????????????????????????????????? ????????????????: Your loyalty inspires us to go higher, and we're grateful for each cheer and encouraging word. Thank you. ????????????#SPARProteas | #MondayMotivation pic.twitter.com/IxQy7Juxix
— Netball South Africa (@Netball_SA) July 31, 2023
Uitslae:
Engeland 89 – 28 Fidji
Zimbabwe 71 – 36 Sri Lanka
Tonga 55 – 47 Skotland
Australië 70 – 46 Malawi
Barbados 55 – 50 Singapoer
Woensdag se bepalings:
09:00: Zimbabwe teen Singapoer
11:00: Wallis teen Uganda
16:00: Jamaika teen Trinidad en Tobago
18:00: Suid-Afrika teen Nieu-Seeland
20:00: Sri Lanka teen Barbados.
