Rafa verloor, Daniil bly no. 1

Rafael Nadal het sy openingswedstryd in Cincinnati verloor. Foto: Twitter.

Rafael Nadal se eerste wedstryd ná sy jongste besering het in teleurstelling geëindig toe Borna Coric hom met 7-6, 4-6 en 6-3 in Cincinnati geklop het.

Die Spanjaard se nederlaag beteken dat Daniil Medvedev se plek heel bo op die ATP-ranglys vir eers veilig is. Nadal het ’n kans gestaan om weer as die wêreld se voorste speler bekend te staan, maar dan moes hy die Western & Southern-ope gewen het, terwyl die Russiese speler vroeg uitgeskakel moes word.

Die 36-jarige speler het met sy bestendigheid teen Coric gesukkel en hy het ná die wedstryd erken dat hy doodeenvoudig net nie goed genoeg was nie.

“Dit is vir my moeilik om iets positief oor vandag se vertoning te sê, maar ek sal beslis moet verbeter. Ek moet meer oefen en meer dae op die baan deurbring,” het Nadal gesê.

“Wanneer jy ’n wedstryd verloor is dit belangrik om aan te beweeg. My hoofprioriteit is om fiks te bly.”

In ander wedstryde het Stefanos Tsitsipas sy plek in die volgende ronde bespreek toe hy vir Filip Krajinovic met 6-3 en 6-4 geklop het, terwyl Taylor Fritz met Nick Kyrgios afgereken het.

In die vroueafdeling het die 19-jarige Emma Raducanu haar wedstryd teen Victoria Azarenka gewen. Dit was die Brit se eerste sege teen ’n topdertigspeler sedert haar Amerikaanse Ope-triomf verlede jaar.

Uitslae:

Stefanos Tsitsipas klop Filip Krajinovic met 6-3 en 6-4

Roberto Bautista Agut klop Marcos Giron met 6-3 en 6-3

Taylor Fritz klop Nick Kyrgios met 6-3 en 6-2

Ben Shelton klop Casper Ruud met 6-3 en 6-3

Dennis Shapovalov klop Tommy Paul met 3-6, 6-4 en 6-3

John Isner klop Hubert Hurkacz met 7-6, 6-7 en 6-2

Cameron Norrie klop Andy Murray met 3-6, 6-3 en 6-4

Sebastian Korda klop Frances Tiafoe met 4-6, 6-1 en 6-4

Borna Coric klop Rafael Nadal met 7-6, 4-6 en 6-3

Iga Swiatek klop Sloane Stephens met 6-4 en 7-5

Emma Raducanu klop Victoria Azarenka met 6-0 en 6-2

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.